ኣድልዎ ምግባር ክልኩል እዩ። እዚ ኣብ ዓንቀጽ 1 ቅዋም ሆላንድ እውን ተገሊጹ ኣሎ። ኣብቲ መዕቆቢ ንኻልኦት ኣድልዎ ክትገብር የብልካን። ዝተፈላለየ ድሕረ ባይታ ዘለዎም ሰባት ኣብቲ መዕቆቢ ብሰላም ብሓባር ክነብሩ ኣለዎም።

ኣብ ልዕሊ ነበርቲ ወይ ሰራሕተኛታት ናይ COA ዝፍጸም ዝኾነ ዓይነት ጎነጽ ወይ ዓመጽ መቕጻዕቲ ክወሃቦ እዩ። ግዳይ ናይ ጎነጽ፣ ዓመጽ ወይ ጾታዊ መጥቃዕቲ ምስ እትኸውን ብዛዕባ እዚ ናብ ፖሊስ ክትሕብር ትኽእል ኢኻ።

ኣብቲ መዕቆቢ ሃይማኖትካ ከተካይድን ፖለቲካዊ ኣረኣእያ ክህልወካን ይኽእል እዩ፡ ካልኦት ግን በዚ ክሽገሩ የብሎምን።

ኣብቲ መዕቆቢ ዘይሕጋዊ ሓሽሽን ኣልኮላዊ መስተታትን ምጥቃም ክልኩል እዩ። ዘይሕጋዊ ዕጸፋርስ ወይ ኣልኮላዊ መስተ ክትሕዝ፡ ክትነግድ ወይ ክትጥቀም ኣይትኽእልን ኢኻ።

ኣብቲ መዕቆቢ ኣብ ደገ ስኽራን ክልኩል እዩ።

ኣብቲ መዕቆቢ ኣጽዋር ምሓዝ ክልኩል እዩ።

ኣብቲ መዕቆቢ ከም በዓል ኒቃብ ወይ ቡርቃ ዝኣመሰለ ንገጽካ ዝሽፍን ክዳን ምኽዳን ክልኩል እዩ።

እትነብረሉ ቦታ ንዓኻን ንብጾትካን ጥራይ እዩ። ካልኦት ሰባት ኣብዚ ንኽነብሩ ከተምጽእ ኣይፍቀደልካን እዩ።

ኣብቲ እትነብረሉ ቦታ ዋላ ሓንቲ ምትዕርራይ ክትገብር ኣይትኽእልን ኢኻ። ናይ ገዛእ ርእስኻ ፍርናሽ ሒዝካ ክትመጽእ ኣይፍቀደልካን እዩ። ናይ ገዛእ ርእስኻ መጋረጃ ወይ ኣብ መንደቕ ዝንጥልጠል ክትሰቅል ውን ኣይፍቀድን እዩ።

ሓደ ነገር እንተሰቢርካ፡ ናይ ጽገና ወጻኢታት ባዕልኻ ክትከፍሎ ኣለካ።

እትነብረሉ ክፍሊ ባዕልኻ ብጽርየት ክትሕዞን፣ ክትግዕዝ እንከለኻ ድማ ጽሩይ ገይርካ ክትሓድጎን ኣለካ። ካብቲ እትነብረሉ ክፍሊ ኣቑሑት ከትወስድ ድማ ኣይፍቀደልካን እዩ።

ኩሎም ነበርቲ ናይቲ መዕቆቢ ናይ ሓባር ቦታታትን ቀረባ ከባቢታትን ጽሬት ናይ ምሕላው ሓላፍነት ኣለዎም።

እንስሳ ዘቤት ክህልወካ ኣይፍቀድን እዩ፣ ብዘይካ ካብ ምምሕዳር ናይቲ መዕቆቢ ብጽሑፍ ፍቓድ ምስ ዝህልወካ።

ሰራሕተኛታት COA ምቚጽጻር ክፍሊ፣ ምሕዳስ ወይ ጽገና ንኽገብሩ ናብቲ እትነብረሉ ክፍሊ ንኽኣትዉ ክትፈቅድ ኣለካ። ሰራሕተኛታት COA ንድሕነት ወይ ንጥዕና ህዝቢ ዘስግእ ሓደጋ ምስ ዝህሉው ብዘይ ፍቓድ ናብቲ እትነብረሉ ክፍሊ ክኣትዉ ይኽእሉ እዮም።

ናብ ኣብ እትነብረሉ ከባቢ ዝተመደበ ካልእ ክፍሊ ወይ ናብ ካልእ ነባሪ ክትግዕዝ ትኽእል ኢኻ።

ገለ ኣቑሑት ንግዚኡ ካብ COA ክትልቃሕ ትኽእል ኢኻ። ንኣብነት: ጻሕሊ: መቑረጺ መግቢ: ዓራት: መንጸፍን ንውላድኪ/ካ ዝኸውን ነገራትን። ነቶም ኣቑሑት ናብ COA ክትመልሶም ኣለካ።

ኣብቲ መዕቆቢ፣ እንተላይ ኣብ ናይ ባዕልኻ መንበሪ ክፍሊ ከተትክኽ ኣይፍቀደልካን እዩ።

ኣብቲ መቐበሊ ቅሉዕ ሓዊ ክትውልዕ ኣይፍቀደልካን እዩ።

ኣብቲ መቐበሊ ቦታ ኣብ ናይ ሓባር ክሽነታት ኣብ ዝርከቡ ቀወምቲ መሳርሒታት ጥራይ ኢኻ መግቢ ክትክሽን እትኽእል።

ኣብቲ መዕቆቢ ንዘሎ መጥፍኢ ባርዕ ብዝኾነ ነገር ክትሽፍኖ የብልካን።

ኣብቲ መዕቆቢ ዝርከቡ መህደሚ መንገድታት ኩሉ ግዜ ንጹር ክኸውን ኣለዎ።

ናይ ባርዕ ደወል ምስ ዝድውል ብቐጥታ ካብቲ ህንጻ ወጺእካ ኣብ ደገ ክትጽበይ ኣለካ። ድሕሪኡ ብሰራሕተኛታት ናይ COA ዝወሃቡ መምርሒታት ትኽተል።

ኣብቲ መዕቆቢ ንዘሎ ንብረትካ ንዝበጽሕ ጉድኣት COA ተሓታቲ ኣይኮነን። ዋላ እቶም መናብርትኻ ኣብ ንብረትካ ጉድኣት ምስዘብጽሑ እውን ተሓታቲ ኣይኮነን።

ኣብቲ መዕቆቢ ኣብ ዘሎ መንበሪኻ ንዝበጽሕ ጉድኣት ተሓታቲ ኢኻ። እቲ ጉድኣት መን ከም ዘስዓበ ንጹር እንተዘይኮይኑ፡ ነፍሲ ወከፍ ኣብቲ መዕቆቢ ዝርከብ ነባሪ ኣብ ምኽፋል ክሕግዝ ኣለዎ።

ኣብቲ መዕቆቢ ድምጺ ከተስዕቡ የብልኩምን። ኣብ መንጎ ሰዓት 22:00 ክሳብ 08:00 ኩሉ ሰብ ክድቅስ ማእንታን ጸጥታ ክህልዎ ኣለዎ።

ኣብቲ መዕቆቢ ንዝርከቡ ሰባት ብዘይ ፍቓድ ፎቶታት፣ ቪድዮታት ወይ ድምጺ ምቕራጽ ክልኩል እዩ።

በጻሕትኻ ኣብቲ መዕቆቢ ኣብ ዝኣትውሉ እዋን ናብ መቐበሊ ኣጋይሽ ክሕብሩን፣ ክወጹ እንከለዉ ድማ ይወጹ ከምዘለዉ ክሕብሩን ኣለዎም። በጻሕቲ ካብ ሰዓት 08፡00 ክሳብ 22፡00 ንኽበጽሑ ርሑው እዩ። ንበጻሕትኻ ካብቲ መቐበሊ ኣጋይሽ ክትወስዶም ኣለካ፣ ብዛዕባኦም ድማ ሓላፍነት ትወስድ። ንበጻሕቲ ብዛዕባ ዝምልከት ሕግታት ካብ COA ክትሓትት ትኽእል ኢኻ።

ንድሕነት ትሕቲ ዕድመ ደቅኻ ሓላፍነት ኣለካ። ብትሕቲ ዕድመ ደቅኻ ዝበጽሕ ጉድኣት ድማ ባዕልኻ ክትከፍሎ ኣለካ።

ኩሎም ካብ 5 ክሳብ 18 ዓመት ዝዕድሚኦም ህጻናት ኣብ ቤት ትምህርቲ ክመሃሩ ኣለዎም። ውላድካ ናብ ቤት ትምህርቲ ክኸይድ ሓላፍነት ኣለካ። ውላድካ ኣብ ቤት ትምህርቲ እንተዘይተማሂሩ፡ ክትቅጻዕ ትኽእል ኢኻ። ኣብ ናይ COA ናይ ሓበሬታ ጣውላ፡ ኣብ ከባቢ ኣብ ዝርከብ ቤት ትምህርቲ ንሓደ ቆልዓ ከመይ ጌርካ ከም እትምዝግቦ ክትሓትት ትኽእል ኢኻ።