ትሕቲ 18 ዓመት እንተድኣ ኮይንካን ብዘይ ስድራ-ቤት ትነብር ምስ እትኸውንን፣ ኣብ ኔዘርላንድ ምንባር

ዋላ መንበሪ ፍቓድ እንተሃለወካ እውን፣

መጽለሊን ምንባርን ኣብ ስድራ-ቤታዊ ኩነታት (OWG)

ዕድመኻ 14 ዓመትን ትሕቲኡን እንተድኣ ኮይኑ፣ ምስ ሓንቲ ስድራ-ቤት ክትነብር ኢኻ።  እዚ ዓይነት ክንክን መጽለሊን ምንባርን ኣብ ስድራ-ቤታዊ ኩነታት (OWG) ይበሃል። ስለዚ ምስ ሓንቲ ከም ናትካ ዜግነት ወይ ባህላዊ ድሕረ-ባይታ ዘለዋ ስድራ-ቤት ክትነብር ኢኻ። እዚ ድማ ኣብ ኔዘርላንድ ቀልጢፍካ ኣብ ገዛኻ ዘለኻ ኮይኑ ንኽስምዓካ ይሕግዘካ። 

ኣብ ኔዘርላንድ ዝተፈላለዩ መጠነ-ንኡስ መዕቆቢ ቦታታት (KSO) ኣለዉ 

እዞም ኣባይቲ ብ Stichting Nidos ምስ ምምሕዳራት ከተማታት ብምትሕብባር ዝተመስረቱ እዮም። ኣብዚ መብዛሕትኡ ግዜ ካብ 3 ክሳብ 12 መንእሰያት ኣብ ዝሓቖፈት ንእሽቶ ጉጅለ ኢኻ ትነብር። ኣብ ውሽጢ KSO፣ ቋንቋ ኔዘርላንድ ትመሃርን ናብ ቤት-ትምህርቲ ትኸይድን። ብተወሳኺ ግብራውን ማሕበራውን ብቕዓታት ንምምዕባል፣ ትምህርትን ምርሒትን ትረክብ። 

ዕድመኻ 15 ዓመት ወይ ልዕሊኡ እንተድኣ ኮይኑ፣ ኣብ ናይ ቆልዑት መንበሪ ጉጅለ (KWG) ወይ ኣብ ንእሽቶ መንበሪ ኣሃዱ (KWE) ኢኻ እትነብር ። 

ናይ ቆልዑት መንበሪ ጉጅለ (KWG) 

ገና ብእኹል ርእሶም ንዘይክእሉ ቆልዑት ዝኸውን ናይ ቆልዑት መንበሪ ጉጅለ (KWG) ኣሎ። ስለዚ ኣብ መዓልቲ 24 ሰዓታት ሓገዝ ክትረኽበሉ ኣብ እትኽእል ቦታ ኢኻ ትነብር። ኣብ ሓደ ናይ ቆልዑት መንበሪ ጉጅለ፣ እንተበዝሑ ዓሰርተው ክልተ ቆልዑት ይነብሩ። ኣብዚ ምሉእ መዓልቲ ኣብ ኩሉ ንጥፈታት ምርሒት ትረክብ። ንቤት-ትምህርቲ ንምኻድ ኣብ ሰዓትካ ምትንሳእ፣ ዕዳጋ ምግባርን ምኽሻንን ዝኣመሰሉ። 

ንእሽቶ መንበሪ ኣሃዱ (KWE) 

ኣብ ንእሽቶ መንበሪ ኣሃዱ (KWE)፣ እንተበዝሑ ካብ 15 ክሳብ 18 ዓመት ዝዕድሚኦም 4 መንእሰያት ብሓባር ይነብሩ። መብዛሕትኡ ግዜ ዝተፈላለየ መበቆል ዘለዎም እዮም። ድሮ ምሉእ ብምሉእ ገዛእ-ርእስኻ ትኽእል ምስ እትኸውን፣ ግን ድማ ዕድመኻ በጽሒ ብሰንኪ ዘይምዃኑ ገና ዘይተደላደልካ እንተድኣ ኮይንካ፣ ኣብዚ ክትነብር ትኽእል ኢኻ። ስለዚ ድማ ኢኻ ኣብዚ ካብ ሜንቶር ምርሒት እትረክብ፣ ንሱ ድማ ገዛእ-ርእስኻ ክኢልካ ምንባር ንኽትመሃር ክሕግዘካ እዩ። 

Nidos ናይ ባዕሉ መዕቆቢ (NEO) 

NEO፣ ካብ 14 ክሳብ 18 ዓመት ንዝዕድሚኦም በይኖም ንዝኾኑ ትሕቲ ዕድመ ወጻእተኛታት ዝኸውን ናይ Stichting Nidos ንእሽቶ መዕቆቢ እዩ። ኣብዚ ካብ 4 ክሳብ 12 ሰባት ኣብ ዝሓቖፉ ንኣሽቱ ጉጅለታት ኢኻ ትነብር። ምሉእ መዓልቲ ድማ ካብ ኣሰልጠንቲ መንእሰያት ምርሒት ትረክብ። ኣብ NEO፣ ቋንቋ፣ ትምህርትን ማሕበራዊ ምዕባለን ብዝምልከት እውን ደገፍ ትረክብ። 

ተወሳኺ ምርሒት ዘለዎ መጠነ-ንኡስ መዕቆቢ (PON) 

እንተድኣ ተቓላዒ ኮይንካን ፍሉይ ክንክን ዘድልየካ እንተድኣ ኮይኑን፣ PON (Perspectief Opvang Nidos) ኣሎ። እዚ፣ ፍሉይ ዝኾነ ንእሽቶ መዕቆቢ ኮይኑ፣ ብዙሕ ውልቃዊ ኣቓልቦ፣ ብዙሕ ምርሒትን ምሳኻ ዝሰማማዕ ኣተሓሕዛን ዘለዎ እዩ። ኣብ ግዜኻ ናብ ቤት-ትምህርቲ ምኻድን ቆጸራ ምሓዝን ብዛዕባ ዝኣመሰሉ ግብራዊ ጉዳያት ድማ መዓልታዊ ደገፍ ክትረክብ ኢኻ። ብተወሳኺ ምስ ሓደ ክኢላ ስነ-ፍልጠት ባህሪ ወይ ወሃቢ ሓገዝ ስሩዕ ርክብ ክህልወካ እዩ፣ ንሱ ድማ ስምዒታዊ ወይ ስነ-ኣእምሮኣዊ ብድሆታት ብዝምልከት ክሕግዘካ እዩ። 

ገሊኦም ቆልዑትን መንእሰያትን ግዳያት ዘይሕጋዊ ምስግጋር ደቂ ሰባት እዮም።

XONAR ምስ NIDOS ብምትሕብባር ዝሰርሕ ውድብ እዩ።

ኣብ XONAR ኣብ ዕጹው ኣከባቢ ኣብ ዝርከብ ገዛ ኢኻ ትነብር።  

ኣብ ከባቢ መበል 17 ዓመት ዕድመኻ፣ ርእስኻ ክኢልካ ንኽትነብር ምድላዋት ክትጅምር ኢኻ።  ንዝቕጽል ስጉምቲ ብግቡእ ንኽትዳሎ ምእንቲ ድማ ምስ ሞግዚትካን ኣለይትኻን ብሓባር ብምዃን ብዛዕባ ሓደ ውጥን ምሕሳብ ኣገዳሲ እዩ። 18 ዓመት ምስ መላእካ፣ ርእስኻ ክኢልካ ክትነብር፣  ክትሰርሕን ክትመሃርን ይፍቀደልካ እዩ። ኣብ ብዙሓት ምምሕዳራት ከተማታት ድማ ገና ተወሳኺ ደገፍ ንምርካብ ናብ VluchtelingenWerk Nederland ክትውከስ ትኽእል ኢኻ። 

ድሕሪ መበል 18 ዓመት ልደትካ እውን ምርሒት ምርካብ ምቕጻል ይከኣል እዩ። እዚ ድማ ዝተናውሐ መዕቆቢ ይበሃል። ስለዚ ሽዕኡ ኣብቲ ዘአንግድካ ስድራ-ቤት ወይ መጠነ-ንኡስ መዕቆቢ፣ ክሳብ መበል 21 ዓመት ልደትካ ንነዊሕ እዋን ክትነብር ትኽእል ኢኻ። እዚ ዝተናውሐ መዕቆቢ፣ ዝያዳ ርእስኻ እትኽእል ንኽትከውንን፣ ኣብ ኔዘርላንድ ብዝበለጸ ንኽትወሃሃድን ድማ ይሕግዘካ።