ኣብ ኔዘርላንድ ክንክን ጥዕና ብኸምዚ እዩ ዝሰርሕ

ንስኻ ባዕልኻ፣ ወይ ኣብ ከባቢኻ ዝርከብ ሰብ ድዩ ንህይወት ኣብ ሓደጋ ዘእቱው ኩነታት ዘሎ? ስለዚ ናብ 112 ደውል። ሽዕኡ ተቐባሊት ተሌፎን ናይ ማእከል ህጹጽ ረድኤት ክትረክብ ኢኻ። እንታይ ከም ዘጋጠመ ግለጽ፣ ከምኡ እውን ንሕቶታት ናይታ ተቐባሊት ተሌፎን መልስ።

ማእከል ህጹጽ ረድኤት ኣምቡላንስ ክሰድድ ይኽእል እዩ። እታ ኣምቡላንስ ንዓኻ ወይ ነቲ ትድውለሉ ዘለኻ ሰብ ናብ ሆስፒታል ክትወስዶ ትኽእል እያ። ሓካይም ናይታ ኣምቡላንስ እውን ቕጽበታዊ ሕክምናዊ ሓገዝ ክገብሩ ይኽእሉ እዮም።

ማእከል ህጹጽ ረድኤት ኣምቡላንስ ኣይሰድድን ድዩ? ከምኡ ምስ ዝኸውን ናበይ ክትከይድ ከም እትኽእል ክንገረካ እዩ። ንኣብነት ናብቲ ኣብቲ ከባቢኻ ዝርከብ ትካል ሓፈሻዊ ሓኪም። ስለዚ መጓዓዝያ ባዕልኻ ከተዋድድ ኣለካ።

ኣብ ኔዘርላንድ ነፍስወከፍ ካብ 18 ​​ዓመት ዕድመ ንላዕሊ ዝኾነ ሰብ መድሕን ክህልዎ ግዴታ ኣለዎ። እዚ ድማ እቲ ግዴታዊ መሰረታዊ መድሕን እዩ። ክሳብ 18 ዓመት ዝዕድሚኦም ቆልዑት ኣብ መድሕን 1 ካብቶም ወለዲ ብነጻ ክምዝገቡ ይኽእሉ እዮም።

ውዕል መሰረታዊ መድሕን እንተድኣ ገይርካ፣ ካብ ዝተፈላለዩ ትካላት መድሕን ክትመርጽ ትኽእል ኢኻ። ዋጋ ውዕል መሰረታዊ መድሕን፣ ኣብ ነፍስወከፍ ትካል መድሕን ቁሩብ ክፈላለይ ይኽእል እዩ፣ ግን ብዙሕ ኣይኮነን።

ብተወሳኺ መመላእታ መድሕን እውን ኣለካ። እዚ ወለንታዊ እምበር ግዴታ ኣይኮነን። ንኣብነት፣ ብዙሕ ግዜ ፊዚዮቴራፒ ወይ ስነ-ኣእምሮኣዊ ሓገዝ ትጥቀም ዲኻ? ከምኡ ምስ ዝኸውን፣ ምሳኻ ዝሰማማዕ መመላእታ መድሕን ክትመርጽ ትኽእል ኢኻ። ኣብዚ እንታይ ዓይነት ክንክን ከም ዘድልየካ ኣብ ግምት ምእታው እውን ጽቡቕ እዩ።

ንመሰረታዊ መድሕን ዝኸውን ወርሓዊ ሓደ መጠን ገንዘብ ባዕልኻ ትኸፍል። እዚ ድማ 'premie' ይበሃል። እቲ መሰረታዊ መድሕን ካብዚ መጠን ገንዘብ ዝዓበየ ክፋል ናይቲ ዘድልየካ ሕክምናዊ ክንክን ይኸፍል። ከም ኣብነት፣ ናብ ሓፈሻዊ ሓኪም ምብጻሕ፣ ዝተወሰኑ መድሃኒታትን ኣብ ሆስፒታል ወይ ክኢላ ስነ-ኣእምሮ ዝግበሩ ኣድለይቲ ሕክምናታትን ክትሓስብ ትኽእል።

መመላእታ መድሕን እውን ኣለካ ድዩ? ከምኡ ምስ ዝኸውን ኣብ ወርሒ ዝያዳ ገንዘብ ትኸፍል። ኣብ ከምኡ ኩነታት፣ እቲ መድሕን ብዘይካ ኣድላዪ ንዝኾነ ክንክን፣ ንገሊኡ ተወሳኺ ክንክን እውን ይኸፍል። መመላእታ መድሕን ባዕልኻ ክትመርጽ ትኽእል ኢኻ፣ ንኣብነት ንሓኪም-ስኒ ዝኸውን መድሕን። ስለዚ እቲ ኣብ ወርሒ እትኸፍሎ መጠን ገንዘብ ኣብ መድሕንካ ዝምርኮስ እዩ።

እቲ መሰረታዊ መድሕን ንመብዛሕትኡ ወጻኢታት ክንክን ጥዕና ይኸፍል። ንስኻ እውን ነፍስወከፍ ዓመት ፍሉይ ክንክን ኣብ ዘድልየካ እዋን መጀመርታ ባዕልኻ ክፋሉ ክትከፍል ኣለካ። እዚ ድማ "ባዕላዊ ብጽሒት" ይበሃል።

እዚ ንሕክምና ጥዕናኻ ወጻኢታት ኣብ እትገብረሉ እዋን ባዕልኻ ክትከፍሎ ዘለካ ግዴታዊ መጠን ገንዘብ እዩ። ኣብ 2023፣ እዚ ግዴታዊ ባዕላዊ ብጽሒት ናይ መድሕን ጥዕናኻ €385 እዩ። ንሕጻናት ባዕላዊ ብጽሒት ኣይምከቶምን እዩ።

ኣብ

VluchtelingenWerk Nederland (VWN)

ልዕሊ 18 ዓመት ዝዕድሚኦም ትሑት ኣታዊ ዘለዎም ሰባት ሓደ ሓደ ግዜ ኣበል ጥዕና ንክረኽቡ መሰል ኣለዎም። ኣበል ጥዕና ንወጻኢታት መድሕን ጥዕናኻ ዝኸውን ካብ መንግስቲ እትረኽቦ መሕወይ ክፍሊት እዩ። ኣበል ጥዕና ክትረክብ ምዃንካን ዘይምዃንካን መጠኑን፣ ኣብ ናትካን ክትህልወካ እትኽእል መጻምድቲ ኣበልን (መብዛሕትኡ ግዜ በዓልቲ-ቤትካ) ኣታዊ ዝምርኮስ እዩ። እቲ ኣታዊ ብዝወሓደ መጠን ድማ ዝያዳ ኣበል ትረክብ።

ማእከላይ ኣካል መቐበሊ ሓተትቲ ዑቕባ (COA)፣

ኣብ ገሊኦም ምምሕዳር ከተማታት፣ ማሕበራዊ ደገፍ ኣውትኬሪንግ ዘለዎም ሰባት ኩለመዳያዊ ውዕል መድሕን ጥዕና ክገብሩ ይኽእሉ እዮም። ንመነባብሮኻ ንምሽፋን እኹል ኣታዊ ወይ ውህሉል ገንዘብ እንተድኣ ዘይብልካ ኮይንካ፣ ማሕበራዊ ደገፍ ኣውትኬሪንግ ናይ ምርካብ መሰል ኣለካ። ካልእ መሳለጥያ ወይ ኣውትኬሪንግ ናይ ምርካብ መሰል ዘይብልካ ምስ እትኸውን፣ ማሕበራዊ ደገፍ ኣውትኬሪንግ ክትረክብ ኢኻ።

ማሕበራዊ ደገፍ ኣውትኬሪንግ ትቕበል ዲኻ፣ ከምኡ እውን ኣብ እትነብረሉ ምምሕዳር ከተማ ኩለመዳያዊ ውዕል መድሕን ጥዕና ንምግባር ክትመርጽ ትኽእል ዲኻ? ስለዚ ኣብ ወርሒ ዝለዓለ መጠን ገንዘብ ትኸፍል፣ እንተኾነ ግን ሕክምናዊ ሓገዝ ኣብ ዘድልየካ እዋን እትኸፍሎ ባዕላዊ ብጽሒት የለን።