ባዕልኻ ብወለንታ ምምላስ ኣፍጋኒስታን
ንምምላስ ዝኽፈል ካሕሳታት
ንዳግመ-ውህደት ዝኸውን ካሕሳ
ኣብ መበቆል ሃገርካ ሓድሽ ምጅማር ንምግባር ካብ መንግስቲ ኔዘርላንድ ተወሳኺ ካሕሳ ክትረክብ ትኽእል ኢኻ። ነዚ ካሕሳ እትረክብ ድማ በዚ ተጠቒምካ ኣቑሑት ወይ ኣገልግሎታት ንኽትከፍል እዩ። ኣብ መበቆል ሃገር ናይ ዳግመ-ውህደት ካሕሳ ዝህብ ፕሮጀክትታት ዘለወን ዝተፈላለያ ውድባት ድማ ኣለዋ።
ንኣብነት ነቲ ካሕሳ፣ ስልጠና ንምክትታል ወይ ንናይ ገዛእ-ርእስኻ ትካል ዝኸውን ኣቚሑት ንምግዛእ ክትጥቀመሉ ትኽእል ኢኻ። ካብቲ ካሕሳ ንእሽቶ ክፋሉ ብጥረ ገንዘብ ክትቕበሎ ትኽእል ኢኻ። እቲ ካሕሳ ከምዚ ዝስዕብ እዩ፡
€ 3080 ንበጽሒ ሰብ፣ ካብዚ እንተበዝሐ € 630 ብጥረ ገንዘብ።
€ 1860 ንትሕቲ ዕድመ፣ ካብዚ እንተበዝሐ € 630 ብጥረ ገንዘብ።
ናይ ምትሕብባር መሻርኽቲ
ኣብ መበቆል ሃገር ዝርከቡ ተሓባበርቲ ውድባት
VluchtelingenWerk ናብ ኣፍጋኒስታን ንምምላስ ዘሎ ኩነታት ከም ውሑስ ኣይቆጽሮን እዩ። ስለዚ ድማ ኣብ ኣፍጋኒስታን ዝሕግዘካ ናይ ምትሕብባር መሻርኽቲ የብልናን።
ካልኦት ውድባት ግን መብዛሕትኡ ግዜ ኣብ ኣፍጋኒስታን ኣብ ምምላስካ ክሕግዘካ ዝኽእል መሻርኽቲ ኣለወን። ዝያዳ ሓበሬታ ንምርካብ ምስዘን ውድባት ርክብ ግበር፣ ወይ ድማ ብዛዕባ እዚ ኣብ VluchtelingenWerk ንዝርከብ ኣማኻሪኻ ሕተት።
ኣብ ኔዘርላንድ ክሕግዙኻ ዝኽእሉ ውድባት
VluchtelingenWerk Nederland (VWN)
VluchtelingenWerk Nederland (VWN) ኣብ እትምለሰሉ እዋን ምርሒት ክህበካ ይኽእል እዩ። VWN ኣብ መበቆል ሃገርካ ምስ ዝርከብ መሻርኽቲ ውድብ እውን ከራኽበካ ይኽእል እዩ።
VWN ምስቶም ንመንግስቲ ናይ ሃገርካ ዘይሰርሑ መሻርኽቲ ውድባት ጥራይ እዩ ዝሰርሕ። ነቲ ውድብ ብዛዕባ ኩነታት ሃገርካ ሕቶታት ክትሓትት ድማ ትኽእል ኢኻ። ንኣብነት ብዛዕባ ድሕነት፣ ስራሕ፣ ክንክን ጥዕና ወይ ስድራ-ቤትካ።
VWN ኣብ ኔዘርላንድ ንምምላስካ ዝኸውን ውጥን ኣብ ምድላው ይሕግዘካ። VWN፣ ኣብ ሃገርካ ምስ ኣተኻ እቲ መሻርኽቲ ውድብ ንዓኻ ድሉው ኮይኑ ከምዝጸንሓካ ይገብር። VWN ከምኡ እውን እቲ መሻርኽቲ ውድብ ኣብኡ ድሕሪ ምእታውካ ክሳብ 1 ዓመት ክድግፉኻ ይኽእሉ እዮም።
Solid Road
Solid Road ንምምላስካ ዝኸውን ኣብ ኔዘርላንድ ውልቃዊ ስልጠናን ምርሒትን ይህብ። Solid Road ምሳኻ ብሓባር ብምዃን ነቲ ናይ ዳግመ-ውህደትካ ካሕሳ ብኸመይ ኣብ ጥቕሚ ከተውዕሎ ከም እትኽእል ዝምልከት ውጥን የዳሉው። ቅድሚ ምምላስካ ብመንገዲ Solid Road ኣብ ኔዘርላንድ ብነጻ ስልጠናታት ክትከታተል ትኽእል ኢኻ።
Solid Road ኣብ መዓልቲ ምብጋስ ኣብ መዓርፎ ነፈርቲ ስኺፖል Schiphol እውን ምርሒት ይህብ፣ ከምኡ እውን ኣብ ሃገርካ ምስ ዝርከብ መሻርኽቲ ውድብ ብምትሕብባር ይሰርሕ፣ ንሱ ድማ ክቕበለካ እዩ።
Dienst Terugkeer & Vertrek (DT&V)
DT&V ባዕልኻ ብወለንታኻ ንኽትምለስ የተባብዕ፣ ከምኡ እውን ንንቕሎኻ ብግቡእ ብምድላውን ኣድላዪ ኣብ ዝኾነሉ ድማ ንዳግመ-ውህደትካ ብዝምልከት ኣብ መበቆል ሃገርካ ደገፍ ብምርካብን፣ ባዕልኻ ብወለንታኻ ንኽትምለስ ኣገዳሲ ኮይኑ ይረኽቦ።
ሓደ ዘይመንግስታዊ ውድብ ደገፍ ክህብ እንተዘይክኢሉ ወይ IOM ናይ ጉዕዞ ሰነዳት ከዳሉው እንተዘይክኢሉ፣ ካብ DT&V ሓገዝ ክሕተት ይከኣል እዩ። ብድሕሪኡ DT&V ባዕሉ ግዝያዊ ሰነድ-ጉዕዞ (laissez-passer - LP) ወይ መተካእታ ሰነድ-ጉዕዞ ንኸመልክት፣ ትኬት ንኽሓዝእ ወይ ንመምለሲ ጉዕዞ ዝኸውን ገንዘብ ንኽህብ ክፍትን እዩ።
ብኣስገዳድ ናብ መበቆል ሃገርካ ክትምለስ ዘለካ ምስ እትውኸን ውሑድ ሓገዝ
እቲ ኣብ ላዕሊ ዝተገልጸ ንነፍስወከፍ ሃገር ዝምልከት ሓገዝ ንምርካብ ዝከኣል ናብ መበቆል ሃገርካ ባዕልኻን ብወለንታኻን ምስ እትምለስ ጥራይ እዩ። ብዛዕባ ምምላስካ ክትተሓባበር እንተድኣ ዘይደሊኻ መንግስቲ ኔዘርላንድ ከገድደካ ይኽእል እዩ። እዚ ድማ ብኣስገዳድ ምምላስ ይበሃል። ኣብ ከምኡ ኩነታት፣ ኣብ እትምለሰሉ እዋን ውሑድ ሓገዝ ትረክብ፣ ወይ ዋላ ሓንቲ ሓገዝ ኣይትረክብን ኢኻ። ስለዚ ሽዕኡ እንተበዝሐ €1,000 ብመልክዕ ኣቑሑት ወይ ምርሒት ክትረክብ ትኽእል ኢኻ።