/
ምምላስ ናብ ኣፍጋኒስታን

ምምላስ ናብ ኣፍጋኒስታን

ናብ ኣፍጋኒስታን ክትምለስ ትሓስብ ኣለኻ ዲኻ? ኣብዚ ገጽ ኣየኖት ካሕሳታት ከምዘለዉን፣ ኣየኖት ውድባት ኣብ ምምላስካ ክሕግዙኻ ከምዝኽእሉን ከተንብብ ትኽእል ኢኻ።

ባዕልኻ ናብ መበቆል ሃገርካ ምምላስ

ባዕልኻ ናብ ሃገርካ ክትምለስ ምምራጽ ቀሊል ኣይኮነን። ሓደ ሓደ ግዜ ብሰንኪ ግብራዊ ምኽንያታት ምምላስ ኣጸጋሚ እዩ። ንኣብነት ናይ መገሻ ሰነድ እንተድኣ ዘይብልካ ኮይንካ።

ሓደ ሓደ ግዜ ንምምላስ ንኽትመርጽ ኣጸጋሚ ዝገብሩ ስምዒታዊ ምኽንያታት ኣለዉ። ንኣብነት ናይ ሕፍረት ስምዒታት፣ ፍሽለት ወይ ብዛዕባ መጻኢ ዝህሉው ዘይርጉጽነት። ከምኡ እውን ሓደ ሓደ ግዜ ኣብ ሃገርካ ከም ብሓድሽ ማሕበራዊ መርበብ ክትሃንጽን፣ ገዛን ስራሕን ክትደልይን ኣለካ።

ካብ ኔዘርላንድ ክትወጽእ ትሓስብ ኣለኻ ዲኻ? ከምኡ ምስ ዝኸውን ዝተፈላለዩ ውድባት ናብ መበቆል ሃገርካ ንኽትምለስ ክሕግዙኻ ይኽእሉ እዮም። ካብዞም ውድባት እትረኽቦ ሓገዝ ብነጻ እዩ።

ንምምላስ ዝኽፈል ካሕሳታት

ንዳግመ-ውህደት ዝኸውን ካሕሳ

ኣብ መበቆል ሃገርካ ሓድሽ ምጅማር ንምግባር ካብ መንግስቲ ኔዘርላንድ ተወሳኺ ካሕሳ ክትረክብ ትኽእል ኢኻ። ብእኡ ተጠቒምካ ኣቑሑት ወይ ኣገልግሎት ንኽትከፍል ድማ ካሕሳ ትረክብ። ኣብ መበቆል ሃገር ናይ ዳግመ-ውህደት ካሕሳ ዝህብ ፕሮጀክትታት ዘለወን ዝተፈላለያ ውድባት ድማ ኣለዋ።

ንኣብነት ነቲ ካሕሳ፣ ስልጠና ንምክትታል ወይ ንናይ ገዛእ-ርእስኻ ትካል ዝኸውን ኣቚሑት ንምግዛእ ክትጥቀመሉ ትኽእል ኢኻ። ካብቲ ካሕሳ ንእሽቶ ክፋሉ ብጥረ ገንዘብ ክትቕበሎ ትኽእል ኢኻ። እቲ ካሕሳ ከምዚ ዝስዕብ እዩ፡

€ 1.800,- ንበጽሒ ሰብ (እንተበዝሐ € 300 ብጥረ ገንዘብ)።
€ 2.800,- ንሓደ ምሳኻ ዝጎዓዝ ቆልዓ ወይ ንውልቁ ዝኾነ ትሕቲ-ዕድመ ቆልዓ (እንተበዝሐ € 300 ብጥረ ገንዘብ)።

ኣብ ኔዘርላንድ ክሕግዙኻ ዝኽእሉ ውድባት

VluchtelingenWerk Nederland (VWN)

https://www.vluchtelingenwerk.nl

VluchtelingenWerk Nederland (VWN) ኣብ እትምለሰሉ እዋን ምርሒት ክህበካ ይኽእል እዩ። VWN ኣብ መበቆል ሃገርካ ምስ ዝርከብ መሻርኽቲ ውድብ እውን ከራኽበካ ይኽእል እዩ።

VWN ምስቶም ንመንግስቲ ናይ ሃገርካ ዘይሰርሑ መሻርኽቲ ውድባት ጥራይ እዩ ዝሰርሕ። ነቲ ውድብ ብዛዕባ ኩነታት ሃገርካ ሕቶታት ክትሓትት ትኽእል ኢኻ። ንኣብነት ብዛዕባ ድሕነት፣ ስራሕ፣ ክንክን ወይ ስድራ-ቤትካ።

VWN ኣብ ኔዘርላንድ ንምምላስካ ብዝምልከት ውጥን ኣብ ምድላው ይሕግዘካ። VWN፣ ኣብ ሃገርካ ምስ ኣተኻ እቲ መሻርኽቲ ውድብ ንዓኻ ድሉው ኮይኑ ከምዝጸንሓካ ይገብር። VWN ከምኡ እውን እቲ መሻርኽቲ ውድብ ኣብኡ ድሕሪ ምእታውካ ክሳብ 1 ዓመት ክድግፉኻ ይኽእሉ እዮም።

Stichting WereldWijd

https://www.stichtingwereldwijd.nl/

Stichting Wereldwijd ድሕሪ ምምላስካ ናይ ገዛእ-ርእስኻ ትካል ንኽትጅምር ይድግፈካ። ንዋታት፣ መሳርሒታትን ማሽናትን ዝሓዘ ሳንዱቕ ድማ ትረክብ። እዚ ድማ ድሕሪ ምምላስካ ቀልጢፍካ ስራሕካ ንኽትጅምር የኽእለካ። ነዚ ብግቡእ ምእንቲ ከዋድደልካ ድማ Stichting Wereldwijd ምስ ኣህጉራዊ ውድብ ፍልሰት (IOM) ብምትሕብባር ይሰርሕ።

Stichting ROS

https://stichtingros.nl/

Stichting ROS ናብ መበቆል ሃገርካ ኣብ እትምለሰሉ እዋን ኣብ ውልቃዊ ኩነታትካ ዘተኮረ ደገፍ ይህብ። ምስ ሓደ ኣብ መበቆል ሃገርካ ዝርከብ ኣሰልጣኒ ብሓባር ብምዃን ድማ ንምምላስካ ብዝምልከት ትዳሎው፣ ብሓባር ብምዃን ናይ መጻኢ ውጥን ትሕንጽጽ፣ ከምኡ እውን ነቲ ናይ ምምላስ ገንዘብ ብኸመይ ኣብ ጥቕሚ ከተውዕሎ ከም እትደልይ ትርእይ። ድሕሪ ምምላስካ ስራሕ ምእንቲ ክትጅምር ድማ ብመንገዲ መርበብ ናይ Vluchtelingenwerk (ERSO) ወይ IOM ትምህርቲ ወይ ስልጠና ክትከታተል ትኽእል ኢኻ።

GoedWerk Foundation

https://goedwerkfoundation.nl/

GoedWerk Foundation ኣብ እዋን ምምላስ ንውልቃዊ ኩነትካ ምርኲስ ብምግባር ምርሒት ይህበካ። ኣብ GoedWerk Foundation ቅድሚ ሕጂ ናብ መበቆል ሃገሮም ዝተመልሱ ሰባት፣ ወሃብቲ ደገፍን ኣሰልጠንትን ይሰርሑ። GoedWerk Foundation ነቲ ምምላስ ምሳኻ ብምዃን እዩ ዘዳልዎ። GoedWerk Foundation ብዛዕባ እዞም ዝስዕቡ ምስ ሓደ ኣብ መበቆል ሃገርካ ዝርከብ መሻርኽቲ ውድብ ብሓባር ይሰርሕ፡

ሰነዳት ምርካብ
ምብጻሕ ናይ ኤምባሲ
ሕክምናዊ ሓገዝ
ምስ ኣባላት ስድራ-ቤትካ ርክብ ምግባር
ንካሕሳ ዳግመ-ውህደት ዝምልከት ውጥን ምግባር
ናይ ምምላስ በረራ

ኣህጉራዊ ውድብ ፍልሰት (IOM)

https://iom-nederland.nl/vrijwillige-terugkeer/wat-is-herintegratieondersteuning

IOM ድሕሪ ምምላስካ ጽቡቕ ምጅማር ምእንቲ ክትገብር ክሕግዘካ ይኽእል እዩ። ኣብ ሃገርካ ድሕሪ ምእታውካ ድማ ምስ IOM ብሓባር ብምዃን ነቲ ናይ REAN ካሕሳ ኣብ ጥቕሚ ከተውዕሎ ትኽእል ኢኻ። ንኣብነት ንገዛ፣ ንትምህርቲ ወይ ትካል ንምጅማር። ነዚ ብዝምልከት IOM ምስቲ ኣብ መበቆል ሃገርካ ዝርከብ ቤት-ጽሕፈት IOM ከራኽበካ እዩ።

Solid Road

https://www.solidroad.nl/

Solid Road ንምምላስካ ዝኸውን ኣብ ኔዘርላንድ ውልቃዊ ስልጠናን ምርሒትን ይህብ። Solid Road ምሳኻ ብሓባር ብምዃን ነቲ ናይ ዳግመ-ውህደትካ ካሕሳ ብኸመይ ኣብ ጥቕሚ ከተውዕሎ ከም እትኽእል ዝምልከት ውጥን የዳሉው። ቅድሚ ምምላስካ ብመንገዲ Solid Road ኣብ ኔዘርላንድ ብነጻ ስልጠናታት ክትከታተል ትኽእል ኢኻ።

Solid Road ኣብ መዓልቲ ምብጋስ ኣብ መዓርፎ ነፈርቲ ስኺፖል Schiphol እውን ምርሒት ይህብ፣ ከምኡ እውን ኣብ ሃገርካ ምስ ዝርከብ መሻርኽቲ ውድብ ብምትሕብባር ይሰርሕ፣ ንሱ ድማ ክቕበለካ እዩ።

Dienst Terugkeer & Vertrek (DT&V)

https://www.dienstterugkeerenvertrek.nl/

DT&V ባዕልኻ ብወለንታኻ ንኽትምለስ የተባብዕ፣ ከምኡ እውን ንንቕሎኻ ብግቡእ ብምድላውን ኣድላዪ ኣብ ዝኾነሉ ድማ ንዳግመ-ውህደትካ ብዝምልከት ኣብ መበቆል ሃገርካ ደገፍ ብምርካብን፣ ባዕልኻ ብወለንታኻ ክትምለስ ኣገዳሲ ኮይኑ ይረኽቦ።

ሓደ ዘይመንግስታዊ ውድብ ደገፍ ክህብ እንተዘይክኢሉ ወይ IOM ናይ ጉዕዞ ሰነዳት ከዳሉው እንተዘይክኢሉ ካብ DT&V ሓገዝ ክሕተት ይከኣል እዩ። ብድሕሪኡ DT&V ግዝያዊ ሰነድ-ጉዕዞ (laissez-passer - LP) ወይ መተካእታ ናይ ጉዕዞ ሰነድ ከመልክት፣ ትኬት ክሓዝእ ወይ ንመምለሲ ጉዕዞ ዝኸውን ገንዘብ ክህብ ክፍትን እዩ።

ኣብ መበቆል ሃገር ዝርከቡ ተሓባበርቲ ውድባት

VluchtelingenWerk ናብ ኣፍጋኒስታን ንምምላስ ዘሎ ኩነታት ከም ውሑስ ኣይቆጽሮን እዩ። ስለዚ ድማ ኣብ ኣፍጋኒስታን ዝሕግዘካ ናይ ምትሕብባር መሻርኽቲ የብልናን።

ካልኦት ውድባት ግን መብዛሕትኡ ግዜ ኣብ ኣፍጋኒስታን ኣብ ምምላስካ ክሕግዘካ ዝኽእል መሻርኽቲ ኣለወን። ዝያዳ ሓበሬታ ንምርካብ ምስዘን ውድባት ርክብ ግበር፣ ወይ ድማ ብዛዕባ እዚ ኣብ VluchtelingenWerk ንዝርከብ ኣማኻሪኻ ሕተት።