ጠበቓ ኣብ እዋን መስርሕ ዑቕባ ነዚ ይገብረልካ

ጠበቓኻ መስርሕ ዑቕባ ብኸመይ ከም ዝሰርሕን፣ ኣየኖት ናይ ህድማ ታሪኽካ ከረጋግጹ ዝኽእሉ ሰነዳት ክትእክብ ከም ዘለካን ከብርሃልካ እዩ። ውድብ

ምስ ጠበቓኻ ብሓባር፣ ኣገልግሎት ኢሚግሬሽንን ዜግነትን (IND) ምናልባት ኣየኖት ሕቶታት ክሓትት ምዃኑ ትዛተ። ከምኡ እውን ብኸመይ ናይ ህድማ ታሪኽካ ብዝተኻእለ መጠን ብንጹር ክትነግር ከም እትኽእል። ናይ ህድማ ታሪኽካ ንምርግጋጽ ኣየኖት ሰነዳት ከምዘድልዩኻ ኣብ ምሕሳብ እውን ጠበቓኻ ክሕግዘካ እዩ። እቲ ጠበቓ ምስ IND ኣብ እትገብሮም ቃለ-መሕትታት ኣይርከብን እዩ። ሓደ ሓደ ግዜ ግን እቲ ጠበቓ ካብ ቤት-ምኽሪ ስደተኛታት (VWN) ሓደ ሰብ ናብ እትገብሮ ቃለ-መሕትት ክመጽእ ዝኽእል እንተኾነ ይሓትት እዩ። 

ጠበቓኻ ኩሎም ኣገደስቲ ሰነዳትን ሓበሬታን ኣብ ናይ ዑቕባ ፋይልካ ዘለዉ ምዃኖምን ዘይምዃኖምን ክቖጻጸር እዩ። ቤት-ምኽሪ ስደተኛታት ኔዘርላንድ (VWN) እውን ብዛዕባ እዚ ንዓኻን ንጠበቓኻን ክሕግዘኩም ይኽእል እዩ። 

IND ምሳኻ ናይ ዝግበሩ ቃለ-መሕትታት ጸብጻባት የዳሉው እዩ። ጠበቓኻ እዚኦም ጸብጻባት ቅኑዓት ምዃኖምን ዘይምዃኖም ክቖጻጸር እዩ፣ ሓደ ነገር ብትኽክል ኣይተጻሕፈን ኢልካ እንተድኣ ሓሲብካ ድማ ለውጢታት ክውስኽ ይኽእል እዩ። እቲ ጠበቓ ብዛዕባ እቲ ጸብጻብ ምሳኻ ክዘራረብ እዩ፣ ብሓባር ድማ ጌጋታት ዘለዉ እንተኾኑን፣ እቲ ትርጉም ቅኑዕ ምዃኑን ዘይምዃኑን ክትመያየጡ ኢኹም።

IND ብዛዕባ ዘመልከትካዮ ዑቕባኻ ውሳኔ እንተድኣ ሂቡ፣ እቲ ጠበቓ ነዚ ክገልጸልካ እዩ፣ እቲ ውሳኔ ብሕጋዊ መዳይ ቅኑዕ ምዃኑን ዘይምዃኑን ድማ ክምርምር እዩ።

IND ንዘመልከትካዮ ዑቕባ እንተድኣ ነጺጉዎ፣ እቲ ጠበቓ ይግባይ ምባል ተመራጺ ምዃኑን ዘይምዃኑን እውን ምሳኻ ክዘራረብ እዩ። እቲ ጠበቓ ይግባይ ንኽትብል ክሕግዘካ እዩ፣ ኣድላዪ እንተኾይኑ ድማ ንዓኻ ወኪሉ ናብ ቤት-ፍርዲ ክኸይድ ይኽእል እዩ። ጠበቓ ነዚ ይግባይ ኣዳልዩ ሰነዳት ናብ ቤት-ፍርዲ ክልእኽ እዩ።

እቲ ጠበቓ ብዝተኻእለ መጠን ብግቡእ ንኽሕግዘካ ምእንቲ ካባኻ ሰነዳትን መርትዖታትን የድልዮ እዩ። መን ምዃንካ ዘርእዩን፣ ታሪኽካ ቅኑዕ ምዃኑን ዘረጋግጹ ሰነዳት። እቲ ጠበቓ ነዚኦም ክትእክብ ካባኻ ትጽቢት ይገብር እዩ። 

ኣብ እዋን ቃለ-ምሕትታት ናይ ህድማ ታሪኽካ ብጽቡቕ ክትነግር ከም እትኽእል ኣረጋግጽ። 

ኣብ እዋን ቃለ-ምሕትታት ገለ ነገር ጽቡቕ ኣይከደን ድዩ? ኩሉ ግዜ ሕጋዊ ሓገዝ ክትረክብ መሰል ኣለካ። ሕቶታት እንተሃልዩካ፣ ወይ ብዛዕባ ምስ IND ዝገበርካዮ ቃለ-መሕትት ርግጸኛ እንተዘይኮንካ ነዚ ምስ ጠበቓኻ ክትዘራረበሉ ትኽእል ኢኻ። ዋላ ነቲ ኣተርጓሚ ብግቡእ ክትርድኦ ዘይትኽእል እንተድኣ ነይርካ፣ ወይ ድማ እቲ ናይ IND ሰራሕተኛ ገለ ነገር ጽቡቕ ኣይገበረን ዝብል ስምዒት ምስ ዝህልወካ እውን።