ኣብ ኔዘርላንድ ግዜን ቆጸራን ኣዝዩ ኣገዳሲ ዝኾነ ስለምንታይ እዩ?

ኣብ ኔዘርላንድ ንፍሉይ ግዜ ቆጸራ ክትሕዝ ከለኻ፡ እቲ ዕላማ መብዛሕትኡ ግዜ እቲ ቆጸራ ኣብቲ ሰዓት ክጅምር እዩ። እዚ ንኣብነት ምስ ሓፈሻዊ ሓኪም፡ ኣብ ቤት ትምህርቲ፡ ኣብ ከባቢያዊ ምምሕዳር ወይ ኣብ ስራሕ ቆጸራታት ይምልከት።

ኣብ ግዚኻ ምምጻእ ክሳብ ክንደይ ኣገዳሲ ምዃኑ ኣብ ኩነታት ይምርኮስ። ንኣብነት ናይ ስራሕ ቃለ-መሕትት ወይ ኣብ ሓደ ትካል ዘለካ ቆጸራ ካብ ምብጻሕ ናብ ቀንዲ ዓርኪ ዝተፈልየ እዩ። ክድንጉይ እየ ኢልካ ትሓስብ ዲኻ? ስለዚ ብዛዕብኡ ንሰባት ምሕባር ንቡር እዩ። ንኣብነት ክትድውል ወይ መልእኽቲ ክትሰድድ ትኽእል ኢኻ። ብኸምዚ እቲ ካልእ ኣካል ስለምንታይ ከም እትደንጉይ ይፈልጥ።

ኣብ ኔዘርላንድ ኣጀንዳ ንስራሕ ጥራይ ኣይኮነን ኣብ ጥቕሚ ዝውዕል። ብዙሓት ሰባት ስፖርት፣ ምብጻሕ ስድራ-ቤት፣ ከምኡ እውን ምስ ኣዕሩኽቶም ቆጸራ ንምግባር እውን ይውጥኑ እዮም።

ከም ውጽኢቱ ድማ፡ ማሕበራዊ መደባት ሓድሓደ ግዜ መዓልታት ወይ ሰሙናት ኣቐዲሙ ይግበር። ሰባት እውን መብዛሕትኡ ግዜ ንሓደ ሰብ ኣብ ገዛ ቅድሚ ምብጻሖም ምድላዋት ይገብሩ። ሰባት ነዚ ብኸመይ ከም ዝሕዝዎ ከከም ውልቀ-ሰብን ስድራቤትን ኩነታትን ይፈላለ ባህርያዊ እዩ።

ውጥን ብቐንዱ ግብራዊ ዕላማ እዩ ዘገልግል። ስራሕ: ስድራቤት: ቤት ትምህርቲ: ስፖርት: ከምኡ እውን ማሕበራዊ ንጥፈታት ኵሉ ምትእንጋድ የድሊ: መደብ ዝግበረሉ ግዜ ድማ ነዚ ይሕግዝ።

ስነ-ፍልጠታዊ መጽናዕትታት ከም ዘመልክትዎ፣ ኔዘርላንዳውያን ግዜኦም ብኸመይ ከም ዘመሓድሩ ብዝምልከት ቆጸራታት ዓቢይ ተራ ከም ዘለዎም ይሕብሩ።

ተመራመርቲ ሓደ ሓደ ግዜ ኣብ መንጎ ንጥፈታት ዝውጥኑ ሕብረተሰባትን፣ ውጥን ዝያዳ ተዓጻጻፊ ክኸውን ዝፈቅዱን ሕብረተሰባትን ይፈላልዩ እዮም። ኣብዚ ዓይነት መጽናዕቲ፣ ኔዘርላንድ መብዛሕትኡ ግዜ ኣብቲ ቀዳማይ ጉጅለ ትምደብ።

ንኣብነት፣ ሓደ ናይ ዩኒቨርሲቲ ኣምስተርዳም ተመራማሪ፣ ኔዘርላንዳውያን፣ ደቡብ ኣፍሪቃውያንን ፓኪስታናውያንን ተሳተፍቲ ደንጒኻ ምምጻእ ብኸመይ ከም ዝርእይዎ ኣጽኒዑ። ብማእከላይ ገምጋም ኔዘርላንዳውያን ተሳተፍቲ ካብ ፓኪስታናውያን ተሳተፍቲ ንላዕሊ ደንጒኻ ምምጻእ ብዙሕ ኣይቕበልዎን። ኔዘርላንዳውያን ተሳተፍቲ ቆጸራታት ኣገዳሲ ምዃኑ ድማ ሓቢሮም።

እዚ ማለት ኔዘርላንዳውያን ኩሉ ግዜ ልክዕ ኣብ ሰዓቶም ይመጽኡ ወይ ኔዘርላንድ ነ ዚብዝምልከት ኣዝያ ጥብቂ እያ ማለት ኣይኮነን። ኣብ ስራሕ ኣብ ኔዘርላንዳውያንን ጀርመናውያንን ዝተገብረ መጽናዕቲ ከም ዘመልክቶ፣ ንኣብነት ኣብ ጀርመን እውን ቆጸራታትን ውጥንን ኣገዳሲ እዩ። ብማእከላይ ገምጋም እቶም ጀርመናውያን ተሳተፍቲ ካብቶም ኔዘርላንዳውያን ተሳተፍቲ ንላዕሊ ግዜን ውጥንን ንዝምልከት ዝያዳ ጥብቂ ነይሮም።

ኣብ ኔዘርላንድ ሓደ ሓደ ግዜ 'afspraak is afspraak' ማለት 'ቀጸራ ቆጸራ እዩ' ዝብል ኣበሃህላ ትሰምዕ ኢኻ። እዚ ማለት ሰባት ንዝገበርካዮ ቆጸራ ወይ ስምምዕ ከተኽብር ኣለካ ኢሎም ይኣምኑ ማለት እዩ።

እዚ ኪኖ ኣብ ግዜኻ ምምጻእ ጥራይ ዝሓልፍ እዩ። ንኣብነት ኣብ ስራሕ ወይ ኣብ እዋን ስልጠና፣ ሓደ ነገር ክሳብ ዝተወሰነ ዕለት ክውዳእ ከም ዘለዎ ኣብ ስምምዕ ክግበር ይከኣል። ከምዚ ዝበለ ናይ መወዳእታ ዕለት deadline' ማለት 'ናይ መወዳእታ ገደብ-ግዜ' ይበሃል።

ቆጸራ ወይ ናይ መወዳእታ ገደብ-ግዜ ከተኽብር ኣይትኽእልን ዲኻ? ስለዚ ነዚ ኣቐዲምካ ምንጋር ብልሒ እዩ። ብድሕሪኡ እቲ ካልእ ሰብ ነዚ ኣብ ግምት ከእትዎን፣ ምናልባት እውን ነቲ ውጥን ከስተኻኽሎን ይኽእል። ስለዚ ኣብ ሰዓትካ ምምጻእ ማለት ኣብ ኩሉ ቦታ ኣዝዩ ኣንጊህካ ክትበጽሕ ኣለካ ማለት ኣይኮነን። ብቐንዱ እቲ ካልእ ኣካል ኣብቲ ዝተገብረ ስምምዕ ምትእምማን ክገብሩ ከምዝኽእሉ ምርግጋጽ እዩ።

መብዛሕትኡ ግዜ ኣብ ዝኽፈሉ ሕሳባት መዓስ ክትከፍሎም ከምዘለካ እውን ተጠቒሱ ይርከብ። ዕለት ክፍሊት ካብ ማሕበራዊ ስምምዕ ወይ ቀጸራ ዝተፈልየ እዩ፣ ምኽንያቱ ሕግታትን ፋይናንሳዊ ሳዕቤናትን ስለዘለዎ።

ዝኽፈል ሕሳብ ኣብ ግዚኡ እንተድኣ ዘይከፊልካ፣ ተወሳኺ ክፍሊት ክወሰኸሉ ይኽእል እዩ። ስለዚ መዓስ ክትከፍል ከምዘለካ ምፍታሽ ኣገዳሲ እዩ።

ሕሳብ ኣብ ግዚኡ ክትከፍል ኣይትኽእልን ዲኻ? ምስቲ ትካል ርኸብ እሞ ብዛዕባ እቶም ዘለዉ ኣማራጺታት ሕተት። ዕዳ ወይ ፋይናንሳዊ ጭንቀት እንተሃልዩካ፡ ንኮሙንካ ሓገዝ ክትሓትት እውን ትኽእል ኢኻ።