ነፍስወከፍ ዓመት ዕለት 4 ግንቦት ኔዘርላንድ ንግዳያት 2ይ ኲናት ዓለም ሓዊሱ ንግዳያት ኲናት ትዝክር። እዚ ድማ መዓልቲ ዝኽሪ ይበሃል። ኣብዚ ዓንቀጽ፣ መዓልቲ ዝኽሪ እንታይ ማለት ምዃኑን እንታይ ከም እተስተብህልን ከተንብብ ትኽእል ኢኻ።
ኣብ እዋን 2ይ ኲናት ዓለም ኔዘርላንድ ኣብ መንጎ 1940ን 1945ን ብጀርመን ተታሒዛ ነይራ። ኣብቲ እዋን እቲ ልዕሊ 100,000 ኔዘርላንዳውያን ኣይሁድ ብጀርመናውያን ጎበጥትን ኔዘላንዳውያን ተሓባበርቶምን ተኣሲሮም ከምኡ እውን ተቐቲሎም። ብዘይካ ኣይሁድ ካልኦት ውሑዳን ጉጅለታት እውን ተኣሲሮምን ተቐቲሎም እዮም።
ኣንጻር ጀርመናውያን ተቓውሞታት ምግባር ከቢድ መቕጻዕቲ ዘስዕብ እዩ ነይሩ። ጀርመናውያን ጎበጥቲ ወይ ኔዘላንዳውያን ተሓባበርቶም ሓደ ሰብ ኣብ ተቓውሞ ይነጥፍ ከምዘሎ እንተድኣ ፈሊጦም መብዛሕትኡ ግዜ ሰባት ይእሰሩ፣ ይሳቐዩ ወይ ይቕተሉ ነይሮም።
ብዕለት 5 ግንቦት 1945 እቲ ጎበጣ ኣብቒዑ። ካብ ፈተውቲ ሃገራት ዝመጹ ወተሃደራት ንኔዘርላንድ ድሕሪ ምሕጋዞም ድማ ጀርመን ኢዳ ሂባ። ስለዚ ኢና ድማ ነፍስወከፍ ዓመት መዓልቲ ሓርነት ኣብ ዕለት 5 ግንቦት ነብዕል።
ኣብ መዓልቲ ዝኽሪ ሰባት ን2 ደቓይቕ ጸጥ ይብሉ
ምሸት 4 ግንቦት ነፍስወከፍ ኣብ ኔዘርላንድ ዝርከብ ሰብ ሰዓት 20፡00 ንግዳያት ኲናት ንምዝካር ን2 ደቓይቕ ስቕታ ክገብር እዩ። ኣብተን 2 ደቓይቕ ድማ ነቶም ኣብ እዋን ኲናት ዝተቐትሉ ኣይሁድ ኔዘርላንዳውያንን ካልኦትን ንዝክር።
እቲ ስቕታ፣ ነቶም ንናጽነት ኔዘርላንድ ዝተቓለሱ ሰባት ኣኽብሮት ንምርኣይ እውን እዩ። ከምኡ ድማ ብዛዕባ እቶም ገና ሕጂ እውን ኣብ ኲናትን ዓመጽን ዝከላበቱ ዘለዉ ሰባት ንምሕሳብ።
ሃገራዊ መዓልቲ ዝኽሪ ኣብ ኣደባባይ ዳም ኣብ ኣምስተርዳም እዩ ዝካየድ
ኣብ ኣምስተርዳም ዝካየድ ሃገራዊ ዝኽሪ ኣብ ኔዘርላንድ እቲ ኣዝዩ ኣገዳሲ ናይ ዝኽሪ ፍጻመ እዩ። ኣብ እዋን እቲ ሃገራዊ ዝኽሪ መደረታት ይቐርቡ፣ ከምኡ እውን ግጥሚ ይንበብ።
ንጉሳዊ ስድራ-ቤት ድማ ኣብቲ ኣብ ዳም -Dam- ዝርከብ ሓወልቲ ኲናት ኣኽሊል ዕንባባታት የንብሩ። ንጉስ ግዳያት ኲናት ዝዝክረሉ መደረ እውን የቕርብ።
ኣብ ኣደባባይ ዳም ተወሳኺ ጸጥታ ኣሎ
ብኢንተርነት ቦታ እንተድኣ ሒዝካ ኣብ ኣምስተርዳም ኣብ ዝካየድ ሃገራዊ ዝኽሪ ክትሳተፍ ትኽእል ኢኻ። ሎሚ ዓመት ኣብ 2024 ኣብ ኣደባባይ ዳም ተወሳኺ ጸጥታ ክህሉው እዩ። እዚ ድማ ኲናት ቓዛ ኣብ ኔዘርላንድ ብሰንኪ ዝፈጠሮ ፖለቲካዊ ወጥሪ እዩ። ከንቲባ ከተማ ኣምስተርዳም፣ ፖሊስ፣ ኣካላት ፍትሒን ወደብቲ ናይቲ ዝኽርን ድማ እዚ ንኽግበር ወሲኖም ኣለዉ።
ተወሳኺ ጸጥታ ብዝምልከት እዚ ዝስዕብ ከተስተብህል ኢኻ፡
ከም ንቡር ኣብ መዓልቲ ዝኽሪ ከባቢ 20,000 ሰባት ኣብ ኣደባባይ ዳም ክህልዉ ምተኻእለ። ሎሚ ዓመት ግን ኣብ ሓደ እዋን 10,000 ሰባት ጥራይ እዮም ክሳተፉ ዝፍቀደሎም። በዚ ምኽንያት እዩ ድማ ኣቐዲምካቦታ ክትሕዝ ዘለካ።
ኣብ መዓልቲ ዝኽሪ ኣብ ኣደባባይ ዳም ተቓውሞ ወይ ሰልፊ ክትገብር ኣይፍቀደልካን እዩ። ስለዚ ሎሚ ዓመት ባንዴራታት ወይ ጽሑፋት ዘለዎም ታቤላታት ሒዝካ ክትመጽእ ኣይፍቀደልካን እዩ። ድምጺ ዝገብሩ ነገራት ከተምጽእ እውን ኣይፍቀደልካን እዩ። ቅድሚ ናብ ኣደባባይ ዳም ምእታውካ ድማ ፖሊስ ክፍትሹኻ እዮም። ፖሊስ ቦርሳታትካ፣ ክዳውንትኻ ወይ ጁባታትካ ክፍትሹ ይኽእሉ እዮም።
ኣብ መላእ ሃገር ድምጺ ኣልቦ ሰልፍታትን ናይ ዝኽሪ ምርኢታትን ይካየዱ
ሓያሎ ከተማታትን ገጠራትን ናይ ዝኽሪ መደባት የዳልዋ እየን። ኣብዚ እውን ሰባት ኣብ ሓወልቲታት ኲናት ኣኽሊል ዕንባባታት የንብሩ። ኣብ ብዙሕ ቦታታት ድማ ሰባት ኣብ ናይ ስቕታ ሰልፊታት ይሳተፉ። ብተወሳኺ ንግዳያት ኲናት ክብሪ ንምሃብ ኣብ መላእ ሃገር ኣስተምህሮታትን ናይ ዝኽሪ ምርኢታትን ይዳለዉ።
ኣብ መዓልቲ ዝኽሪ ኣብ ጎደና ነዚ ከተስተብህል ኢኻ
ሰባት ንባንዴራ ኔዘርላንድ ኣብ ገዝኦም ኣብ ፍርቂ ዓንዲ ይሰቕልዋ። ባንዴራ ኣብ ፍርቂ ዓንዲ ምስቓል ኣብ ሓዘን ከም ዘለኻ ዘርእይ እዩ። ኣብ ዕለት 5 ግንቦት ድማ መዓልቲ ሓርነት ንምጽምባል ሰባት ነታ ባንዴራ ብንቡር ይሰቕልዋ።
ዳርጋ ኣብ ኩሉ ህዝባዊ ቦታታት ሰዓት 20፡00 ስቕታ ኣሎ። ነፍስወከፍ ሰብ ስቕታ ክገብርን፣ ኣብ መኪና ይኹን ብሽክለታ ዘይምዝዋርን ኣገዳሲ እዩ። ኣብ ህዝባዊ መጓዓዝያ እውን መራሕቲ መካይን ኣውቶቡሳቶም ኣብ ወሰን ጽርግያ ደው የብሉ። ኣብ ኣብያተ-መግብታትን ካፈታትን ድማ ሰራሕተኛታት መብዛሕትኡ ግዜ ሰዓት 20፡00 ምስ ቀረበ ናይ 2 ደቓይቕ ስቕታ ዝግበረሉ ግዜ ምዃኑ ይነግሩ።
