ኣብ ኔዘርላንድ መስርሕ ዑቕባኻ ብግቡእ ንምድላው እዚ ክትገብር ትኽእል
ኣብ ማሕበራዊ ሚድያ ኣካፍል፡
ኣብ ኔዘርላንድ መስርሕ ዑቕባኻ ቅድሚ ምጅማሩን፣ ምስ IND ናይ መጀመርታ ቃለ-መሕትት ቅድሚ ምግባርካን ነዊሕ ግዜ ክወስድ ይኽእል እዩ። ንኹሉ ክፋላት ናይ ህድማ ታሪኽካ፣ ድሒርካ ከምዚ ናይ ሕጂ ጽቡቕ ገይርካ ዘይትዝክሮ ክትከውን ትኽእል ኢኻ። ነዊሕ ግዜ ክትጽበይ ዘለካ ምስ እትኸውን፣ ብኸመይ ነቲ መስርሕ ብዝበለጸ ክትዳሎ ከም እትኽእል ኣብዚ ታሕቲ ከተንብብ ትኽእል ኢኻ።
ውልቃዊ ታሪኽካ ኣገዳስነቱ ቀጻሊ እናወሰኸ ይኸይድ
ካብ 1 ሓምለ 2024 ጀሚሩ፣ IND ንውልቃዊ ናይ ህድማ ታሪኽካ ኣብ መስርሕ ዑቕባ ዝያዳ ኣገዳሲ ገይሩ እዩ ዝቖጽሮ። ኣብ ሃገርካ ካብ ዝርከብ ኩነታት ንላዕሊ ኣገዳሲ እዩ። IND ንመስርሕ ዑቕባኻ ክግምግም እንከሎ ብቐንዱ ንውልቃዊ ታሪኽካ ዝኣምኖ ምዃኑን ዘይምዃኑን እዩ ዝርእይ። ስለዚ ድማ ንውልቃዊ ታሪኽካ ዝድግፉ ሰነዳት ክህልወካ ዝያዳ ኣገዳሲ ኮይኑ ይርከብ። ቅድሚ 1 ሓምለ 2024 ንሓፈሻዊ ኩነታት ሃገርካ ወይ ጉጅለኻ ዝያዳ ቆላሕታ ይወሃቦ ነይሩ። IND ሕጂ እውን ነዚ ይርእዮ እዩ። እንተኾነ ግን ውልቃዊ ኩነትካ ካብኡ ንላዕሊ ዝያዳ ኣገዳሲ ኮይኑ ኣሎ። ስለዚ ውልቃዊ ታሪኽካ ብዝተኻእለ መጠን ብዝርዝር ንIND ክትነግሮ ምኽኣል ኣዝዩ ኣገዳሲ እዩ።
ናይ ህድማ ታሪኽካ ብዝርዝር ጸሓፍ
ምስ IND ኣብ እትገብሮ 2ይ ቃለ-መሕትት ንምንታይ ኣብ ኔዘርላንድ ዑቕባ ትሓትት ከምዘለኻ ትገልጽ ኢኻ። ናብ መበቆል ሃገርካ ምምላስ ስለምንታይ ሓደገኛ ምዃኑ እውን። ሓደ ሓደ ግዜ ምስ IND 1ይ ቃለ-መሕትትካ ክሳብ ትገብር ነዊሕ ግዜ ይወስድ እዩ፣ ስለዚ ሽዑኡ ነገራት ክትርስዕ ወይ ብዝርዝር ብዙሕ ዘይትዝክሮም ክትከውን ትኽእል ኢኻ። ኣገዳሲ ሓበሬታ ንኸይትርስዕ ንምርግጋጽ ድማ ነዞም ዝስዕቡ ክትገብር ትኽእል፡
1. ናይ ህድማ ታሪኽካ ብዝርዝር ብቅኑዕ ቅደም ተኸተል ግዜ ጸሓፎ
ንኹሎም ካብ ሃገርካ ክትወጽእ ዘገደዱኻ ሓፈሻዊን ውልቃዊን ፍጻመታት ጸሓፎም። ዕለታት፣ ቦታታት፣ ኣብቲ ጉዳይ ናይ ዝተሳተፉ ሰባት ወይ ኣካላት ኣስማትን፣ ካልኦት ኣገደስቲ ዝርዝራትን ጸሓፍ።
2. ኣገደስቲ ዝርዝራት ምእንቲ ከይትርስዕ ንታሪኽካ ተመሊስካ ኣዘውቲርካ ኣንብብ
ሓደ ሓደ ግዜ፣ ምስ ምንዋሕ ግዜ ነቲ ልክዕ ቅደም ተኸተል ናይ ፍጻመታት ትርስዖ ኢኻ። ወይ ንዓኻ ሒደት ኣገዳስነት ዘለዎም፣ ግን ድማ ንIND ኣገደስቲ ዝኾኑ ዝርዝራት ክትርስዕ ትኽእል። ዝጸሓፍካዮ መዘኻኸሪ ምስ IND ናብ እትገብሮም ቃለ-መሕትታት ሒዝካዮ ክትከይድ ስለዘይፍቀደልካ፣ ነዚ ብጥንቃቐ ክትዝክሮ ፈትን። ስለዚ ታሪኽካ ብግቡእ ክትነግርን፣ ብኣእምሮኻ ክትዝክሮን ክትክእል ኣለካ።
3. ናይ ህድማ ታሪኽካ ዝድርዕ መርትዖ ኣክብ
ንታሪኽካ ዝድግፉ ናይ ነፍስወከፍ እትገልጾ ፍጻመ ሰነዳት ኣክብ። እዚኦም ስእልታት፣ ጸብጻባት ሕክምና፣ ወግዓዊ ሰነዳት፣ ዓንቀጻት ጋዜጣታት፣ ወይ ድማ ነቲ ታሪኽ ዘረጋግጹ ናይ መሰኻኽር መግለጺታት ክኾኑ ይኽእሉ። ኦርጅናል ሰነዳት ክህልወካ እውን ኣገዳሲ እዩ። IND ነዚኦም ክኣምኖም ልዑል ተኽእሎ ኣሎ።
IND እዞም ሰነዳት ዘለዉኻ ክነሱ ንታሪኽካ ዘይኣምኖ ክኸውን ገና ከጋጥም ይኽእል እዩ። ወይ ድማ እቶም ሰነዳት እኹል መርትዖ ዘይኮኑ ክኾኑ ይኽእሉ። ሰነዳት ዘለካ ምዃኑ ዘመልከትካዮ ዑቕባ ብኣውቶማቲክ ይጸድቕ ማለት ኣይኮነን። ከምዚ ኮይኑ እናሃለወ ግን ንዛንታኻ ዘረጋግጹ ሰነዳት ምስ ዝህልወካ፣ IND ኣቀዲሙ ንኽኣምኖም ተኽእሎኡ ዝለዓለ እዩ። ብፍላይ ኦርጅናል ሰነዳት እንተኾይኖም። ስለዚ ኩሉ ግዜ ንታሪኽካ ዘረጋግጹ ሰነዳት ክትረክብ ፈትን።
ናይ ህድማ ታሪኽካ ብኸመይ ብዝርዝር ከም እትጽሕፎ ዘብርህ ኣብነት
ኣብታ ኣነ ዝመጻእኩላ ከተማ ካብ ዝርከብ ፖለቲካዊ ቤት-ጽሕፈት ኣስታት ክልተ ሚእቲ ሜትሮ ርሒቕካ ሓደ መደበር ፖሊስ ኣሎ። ፖሊስ መዓልታዊ ኣብኡ ኮለል ይብሉ እዮም፣ ናብቲ ቤት-ጽሕፈት ንዝኸዱ ሰባት ድማ ይቖጻጸሩ። ከባቢ ሓደ ግዜ ኣብ ሰሙን ንበይነይ ተፈልየ ይውሰድ ነይረ፣ ኣባል ናይ ሓደ ፖለቲካዊ ምንቅስቓስ ምዃነይ ስለ ዝፈለጡ ድማ ምፍርራሕ ይበጽሓኒ ነይሩ። ሽዕኡ ንሳቶም፡ “ኣንታ ረሳሕ ክንቀትለካ ኢና፣ ብድሕሪኡ ድማ ካባኻ ነዕርፍ” በሉኒ። ከምኡ እውን፡ “ንስኻትኩም ነዚ ፖለቲካዊ መንገዲ እትኽተሉ ሰባት ክንውድኣኩም ኢና፣ ክንቀትለኩም ኢና።” በሉኒ። ሓደ መዓልቲ ሓደ ፖሊስ ሽጉጡ ኣውጺኡ ንሓደ ኣነ ዝፈልጦ ሰብ ተኲሱ ኣውዲቕዎ። እቲ ፖሊስ ንገዛእ-ርእሱ ክከላኸል ከምኡ ከም ዝገበረ ተዛሪቡ። ኣብ ከምዚ ዝኣመሰሉ እዋናት ይፈርሕ ነይረ፣ ምኽንያቱ ከምዚ ዓይነት ኩነታት ብዙሕ ግዜ የጋጥም ስለ ዝነበረ፣ ንዓኻ መዓስ ከምኡ ከጋጥመካ ከም ዝኽእል ድማ ኣይትፈልጥን ኢኻ።
ኣብነት ክትእክቦ እትኽእል ናይ ህድማ ታሪኽካ ዝድርዕ መርትዖ
ንናይ ህድማ ታሪኽካ ዝኸውን መርትዖ ናይ ምእካብ ኣብነት
ካብ ኣሕዋተይ ሓደ ብጥይት ተሃሪሙ፣ እቲ ካልኣይ ድማ ተቐቲሉ። ስለምንታይ ከም ዝተቐትለ ብልክዕ ኣይፈልጥን እየ፣ ግን ልክዕ ከማይ ኣባል ናይ ሓደ ፖለቲካዊ ውድብ ስለ ዝነበረ ይመስለኒ። ስለዚ እየ ድማ ናይ ሓወይ ናይ ሞት ምስክር ወረቐት ንIND ዘረክብ ዘለኹ። ብተወሳኺ ኣባላት ናይቲ ፖለቲካዊ ውድብ ከም ዝነበርና እውን መርትዖ ኣለኒ። ብዛዕባ ቅትለት ናይ ሓወይ ዝገልጽ ዓንቀጽ እውን ኣብ ጋዜጣ ተጻሒፉ ነይሩ እዩ። ድሕሪ እቲ ቅትለት፣ ብዛዕባ ኣብቲ ውድብ ዘለኒ ኣባልነት ሕቶታት ክሓቱ ሰባት ናብ ገዛይ መጺኦም ነይሮም። ድሒሮም ድማ ናይ ምፍርራሕ ደብዳቤ ሰዲዶምለይ። ንዓኣ ኸኣ ዓቂበያ ጸኒሐ።
ናይ ህድማ ታሪኽካ ንምድራዕ ሓገዝ ክትረክብ ትኽእል ኢኻ
ካብ ጠበቓታት ወይ ካብ VluchtelingenWerk Nederland ሓገዝ ክትሓትት ትኽእል ኢኻ። ሕጋዊ ምኽሪ ክህቡኻ ወይ ድማ ታሪኽካ ንምድራዕን ንምሕያልን ክሕግዙኻ ይኽእሉ እዮም። ስለዚ ሽዕኡ VluchtelingenWerk Nederland ምሳኻ ብሓባር ብምዃን
ኣብ እዋን መስርሕ ዑቕባ መሰላት ኣለዉኻ
ኣብ ኔዘርላንድ ዑቕባ እንተድኣ ሓቲትካ መሰላት ኣለዉኻ። ዝኾነ ካብዞም መሰላት ዝተጣሕሰ ኣሎ ድዩ? ስለዚ ብዛዕባ እዚ ንጠበቓኻ፣ ወይ ኣብ ቦታኻ ንዝርከብ VluchtelingenWerk ሓብር። እዞም ዝስዕቡ መሰላት ኣብ እዋን መስርሕ ዑቕባ ክትፈልጦም ዘለካ ዝያዳ ኣገደስቲ እዮም፡
መሰል ሕጋዊ ሓገዝ
መሰል ሕጋዊ ሓገዝ
ብነጻ ጠበቓ ክትረክብ መሰል ኣለካ።
መሰል ኣተርጓሚ
ቋንቋኻ ዝዛረብ ኣተርጓሚ ክትረክብ መሰል ኣለካ። እንተኾነ ግን እዚ እንተዘይተረኺቡን፣ ካልእ ቋንቋ ወይ ላህጃ ትዛረብ ምስ እትኸውንን፣ ቃለ-መሕትታት በቲ ካልእ ቋንቋ ዝካየዱ ክኾኑ ይኽእሉ እዮም።
መሰል ሓበሬታ
ብዛዕባ መስርሕ ዑቕባን ኣካይዳኡን ሓበሬታ ናይ ምርካብ መሰል ኣለካ። እዚ ማለት ኣየኖት ውድባት ተራ ከም ዘለወንን፣ ናይቲ መስርሕ ዝተፈላለዩ ስጉምቲታት ኣየኖም ምዃኖምን ብዝምልከት መብርሂ ትረክብ ማለት እዩ። ኣብ እዋን እቲ መስርሕ ካባኻ እንታይ ትጽቢት ከምዝግበር ብዝምልከት እውን። እዚ ሓበሬታ ካብ VluchtelingenWerk Nederland ኢኻ እትረኽቦ።
መሰል ብሕትና
ኣብ እዋን መስርሕ ዑቕባ ናይ ብሕትናን ምስጢራዊነትን መሰል ኣለካ። እዚ ማለት እቲ ንIND ከምኡ እውን ጠበቓኻ እትህቦ ሓበሬታ፣ ኣብ ሃገርካ ዝርከብ መንግስቲ ምስ ዝኣመሰሉ ካልኦት ኣካላት ኣይካፈልን ማለት እዩ።
መሰል ርትዓዊ ኣተሓሕዛ
ብIND ጥንቁቕን ውልቃዊ ዝኾነን ገምጋም ንኽግበረልካ መሰል ኣለካ። IND ብመሰረት ዓሌት፣ ሃይማኖት፣ ጾታ፣ ዜግነት፣ ጾታዊ ምርጫ፣ ፖለቲካዊ ኣረኣእያ ወይ ካልኦት ረቛሒታት ኣድልዎ ክገብር ኣይፍቀደሉን እዩ።
ናይ ይግባይ መሰል
ናይ ዑቕባ ሕቶኻ እንተድኣ ተነጺጉ፣ ኣንጻር እቲ ውሳኔ ይግባይ ናይ ምቕራብ መሰል ኣለካ። ነዚ ውሳኔ ኣብ ቤት-ፍርዲ ንኽትምጒቶ ሕጋዊ ሓገዝ ክትረክብ ትኽእል ኢኻ።