ኣብ ኤርትራ ሃገራዊ ኣገልግሎት እንተድኣ ነይርካ ኣብ ኔዘርላንድ ብዝቐለለ ዑቕባ

ብሰንኪ ሲቪላዊ ሃገራዊ ኣገልግሎት ካብ ኤርትራ ዝሃደምካ ምስ እትኸውን ሕጂ ኣብ ኔዘርላንድ ብቐሊሉ ዑቕባ ክትረክብ ትኽእል ኢኻ። ቅድሚ ሕጂ ብምኽንያት ወተሃደራዊ ኣገልግሎት ድሮ ኣብ ኔዘርላንድ ዑቕባ ክትረክብ ትኽእል ነይርካ ኢኻ። ሕጂ መንግስቲ ኔዘርላንድ እዚ ኣብ ሲቪላዊ ሃገራዊ ኣገልግሎት እውን ልክዕ ከምኡ ክኸውን ወሲኑ ኣሎ። እዚ ንኣብነት ኣብ ኤርትራ ኣብ ትምህርቲ ወይ ኣብ ክንክን ጥዕና ዝገበርካዮ ሃገራዊ ኣገልግሎት እዩ።

ሃገራዊ ኣገልግሎት ኣብ ልዕሌኻ ብሰንኪ ዘስዓቦ ኣሉታዊ ሳዕቤን ከም ዝሃደምካ ክትገልጽ ትኽእል ዲኻ? ስለዚ ብቐሊሉ ናይ ዑቕባ መንበሪ ፍቓድ B ንምርካብ ክትበቅዕ ኢኻ። 

መንግስቲ ኔዘርላንድ ኣብ ወርሒ ታሕሳስ ዝተሓትመ ንኤርትራ ዝምልከት ወግዓዊ ጸብጻብ መሰረት ብምግባር ንፖሊሲ ዑቕባ ከስተኻኽሎ ወሲኑ ኣሎ። እቲ ጸብጻብ ብዛዕባ ኣብ ኤርትራ ዝርከብ ኩነታት ሓበሬታ ዝህብ እዩ። እዚ ጸብጻብ፣ ኣብ ኤርትራ ኣብ ወተሃደራዊ ኣገልግሎት ንዝሳተፉ ጥራይ ዘይኮነስ፣ ኣብ ሲቪላዊ ሃገራዊ ኣገልግሎት ንዝሳተፉ እውን ሓደጋ ግህሰት፣ ጾታዊን ምስ ጾታዊ-መንነት ዝተሓሓዝን ዓመጽ፣ ግዱድ ዕስክርናን ካልኦት ዓይነታት ግህሰትን ከምዘጋጥሞም ይሕብር።

ግን ኣገልግሎት ኢሚግሬሽንን ዜግነትን (IND) ንውልቃዊ ኩነትካን ኣብ ኤርትራ ሓደጋ ዘለካ ምዃንካን ዘይምዃንካን እውን ይግምግም እዩ። ንኣብነት IND ናይ ኣየናይ ፖለቲካውን ማሕበራውን ጉጅለ ኣባል ከም ዝነበርካ፣ ዕድሜኻ ክንደይ ምዃኑን፣ ኣየናይ ዕማም ስራሕ ትፍጽም ከም ዝነበርካን ይምርምር።

ካብ ኤርትራ ዝመጽኡ ክነሶም ንመንግስቲ ኤርትራ ዝድግፉ ሰባት ዑቕባ ናይ ምርካብ ተኽእሎኦም ትሑት እዩ። ኣብ ዝሓለፈ ወርሒ ለካቲት ኣብ ኔዘርላንድ ኣብ መንጎ ኣብ ኤርትራ ናይ ዝርከብ ስርዓት ደገፍትን ተቓወምትን ባእሲ ተኻይዱ ነይሩ። ብመሰረት ጸብጻብ ኩነታት ኤርትራ፣ ደገፍቲ ናይቲ ስርዓት ናብ ኤርትራ ኣብ ዝምለስሉ እዋን ልክዕ ከም ካልኦት ኤርትራውያን ሓደጋታት ኣየጋጥሞምን እዩ። ኣብ እዋን  መስርሕ ዑቕባ ደጋፊ መንግስቲ ኤርትራ ኮይንካ ተረኺቡ ድዩ? ስለዚ IND ናይ ዑቕባ መንበሪ ፍቓድ ክትረክብ ምዃንካን ዘይምዃንካን ኣብ ምውሳን ነዚ ኣብ ግምት ከእትዎ እዩ።