ናይ ዑቕባ መንበሪ ፍቓድ ምስ ዝህልወካ ምውህላል ጡረታ ኣብ ኔዘርላንድ ብኸምዚ እዩ ዝሰርሕ

 ኣብ ኔዘርላንድ ትሰርሕ ምስ እትኸውን ብ 2 ኣገባባት ጡረታ ክትሃንጽ ትኽእል፡

• ብመሰረት ሓፈሻዊ ሕጊ ጡረታ እርጋን (AOW) መሰረታዊ ጡረታ ትሃንጽ። እዚ ብመንገዲ ግብሪ ደሞዝካ ብኣውቶማቲክ እዩ ዝዋደድ።

• መብዛሕትኡ ግዜ  ምስ ኣስራሒኻ ተወሳኺ ጡረታ ትሃንጽ። 

ካብ ዩክሬን ዲኻ ሃዲምካ፣ ዕድሜኻ ድማ ልዕሊ 67 ዓመት ድዩ? ስለዚ ከም ዓይኒ ሓቂ ዕድሜኻ ኣብ ኔዘርላንድ ጡረታ ክትረኽበሉ ዝግባእ ዝነበረ ዕድመ እዩ። ይኹን እምበር ኣብ ኔዘርላንድ ስለ ዘይሰራሕካ ጡረታ ኣይትረክብን ኢኻ። ካብ መንግስቲ ኔዘርላንድ ናይ መነባብሮ ኣበል ግን ክትረክብ ኢኻ።

ካብ ዩክሬን ዝሃደምካን ኣብ ኔዘርላንድ ትሰርሕን ምስ እትኸውን፣ ናይ ነፍስወከፍ ዝሰራሕካሉ ዓመት ብኣውቶማቲክ AOW ትሃንጽ። ኣብ ኔዘርላንድ ንነዊሕ እዋን ብዝሰራሕካ መጠን ድማ ዝያዳ AOW ትሃንጽ።

ናይ መወዳእታ ገደብ ናይ AOW ኣብዚ ዝስዕብ እዩ ዝምርኮስ፡

• AOW ዝተሃንጸሉ ብዝሒ ዓመታት፤

• AOW ንኽትረክብ መሰል ኣብ ዝህልወካ እዋን ዘለካ (ናይ ምንባር) ኩነት። በይንኻ ትነብር እንተድኣ ኮይንካ ዝያዳ AOW ትረክብ። ብሓባር ትነብር ወይ ዝተመርዓኻ ምስ እትኸውን ድማ ዝወሓደ AOW ትረክብ።

ብደሞዝ ተቖጺርካ ትሰርሕ ምስ እትኸውን መብዛሕትኡ ግዜ መመላእታ ጡረታ ትሃንጽ ኢኻ። ዋላ ብመንገዲ ቤት-ጽሕፈት ዕዮ ተቖጺርካ ትሰርሕ ምስ እትኸውን እውን። ኣስራሕቲ ንጡረታኻ ኣበርክቶ ክገብሩ ግዴታ የብሎምን። ይኹም እምበር መብዛሕትኦም ኣስራሕቲ ከምኡ ይገብሩ እዮም። 

ስለዚ ንስኻን ኣስራሒኻን ብሓባር ጡረታ ብመንገዲ ማዕከን ወይ መድሕን ጡረታ ተዋህልሉ። እዚ ድማ ስራሕ ምስ ኣቋረጽካ ነቲ ናይ ጡረታ ገንዘብካ የመሓድርን ይኸፍልን። መብዛሕትኡ ግዜ ኣስራሒ መበል ⅔ ክፋል ይኸፍል፣ ንስኻ ድማ ነቲ ዝተረፈ መበል ⅓ ክፋል ትኸፍል። ብጽሒትካ ካብ ደሞዝካ እዩ ዝቑረጽ። ስለዚ ብዛዕባ እዚ ባዕልኻ ዋላ ሓንቲ ነገር ምግባር ኣየድልየካን እዩ።

እዚ ንዓኻ ብኸመይ ከም ዝዋደደልካ ኣብ ናይ ስራሕ ውዕልካ ወይ ኣብ ሓባራዊ ስምምዕ ዕዮ (CAO) ተጠቒሱ ይርከብ። ኩሉ ግዜ ብዛዕባ ውዕል ስራሕካ ኣብ እትዘራረበሉ እዋን ብዛዕባ እዚ ክትሓትት ትኽእል ኢኻ።