ኣብ ኔዘርላንድ ኣበዓዕላ ዓርቢ ስቕለትን ፋሲካን

ዓርቢ ስቕለት ኣመንቲ ክርስትና ኢየሱስ ንዝተሰቕለላ መዓልቲ ዝዝክሩላ እያ። ንኣመንቲ ክርስትና እዛ መዓልቲ እዚኣ ኢየሱስ ምእንቲ ደቂ ሰባት ንዝኸፈሎ መስዋእቲ እትውክል እያ። ብመሰረት መጽሓፍ ቅዱስ፣ ኢየሱስ ብሞቱ ንዕዳ ሓጢኣት ደቂ ሰባት ከፊልዎ።

ኣብ እዋን ፋሲካ ኣመንቲ ክርስትና ንትንሳኤ ኢየሱስ ካብ ሞት የብዕሉ። ብመሰረት መጽሓፍ ቅዱስ፣ ኢየሱስ ድሕሪ ስቕለቱ ኣብታ ሰንበት እዩ ካብ ሞት ተንሲኡ። ኣብ ክልቲኡ በዓላት ድማ ፍሉይ ናይ ቤተ-ክርስቲያን ኣገልግሎት ኣሎ።

ኣብ ኔዘርላንድ ብመሰረት

ማእከላይ ቤት-ጽሕፈት ስታቲስቲክስ (CBS)

ኣብ ኔዘርላንድ ኣብ ቀዳማይ ፋሲካ (ኩሉ ግዜ ኣብ ሰንበት እትውዕል) ብዙሓት ድኳናት ዕጹዋት እዮም። ኣብ ካልኣይ ፋሲካን (ኩሉ ግዜ ኣብ ሶኑይ እትውዕል) ዓርቢ ስቕለትን ግን ብዙሓት ድኳናት ክፉታት እዮም፣ ኮይኑ ግን ገሊኦም ድኳናት ናይ ስራሕ ሰዓታቶም የስተኻኽልዎ እዮም።

ኣብ ዓርቢ ስቕለትን ፋሲካን ብዙሓት ሰባት ካብ ስራሕ ወይ ካብ ቤት-ትምህርቲ ዕረፍቲ ይረኽቡ። ኩሉ ሰብ ግን ነጻ ኣይኮነን። ንኣብነት ኣብ ክንክን ጥዕና ወይ ኣብ ጽላት እንግዶት ትሰርሕ ምስ እትኸውን መብዛሕትኡ ግዜ ክትሰርሕ ኣለካ። ብዘይካ ባዕልኻ ንኣስራሒኻ ዕረፍቲ ምስ እትሓትትን ሕቶኻ ምስ ዝጸድቕን።

ኔዘርላንዳውያን 2 መዓልታት ፋሲካ ብዝተፈላለየ ኣገባባት የብዕሉ። ገሊኦም ንፍሉይ ቅዳሴ ፋሲካ ናብ ቤተ-ክርስቲያን ይኸዱ፣ ገሊኦም ድማ ምስ ቤተሰቦምን ፈተውቶምን የሕልፍዎ። ኣብ በዓል ፋሲካ ሰባት መብዛሕትኡ ግዜ ብሓባር ቁርሲ ይበልዑ፣ እዚ ግን ጽንባረ ቁርስን ምሳሕን ወይ ድራር ክኸውን እውን ይኽእል እዩ። ከም ዕዳጋታት ፋሲካ፣ ሓዊ ፋሲካን ምርኢታዊ ሰልፊታትን ዝኣመሰሉ ፍጻመታት እውን ይውደቡ እዮም።

ብዙሓት ኔዘርላንዳውያን ኣብ በዓል ፋሲካ እንቋቑሖታት ኣብ ጀርዲን ወይ ኣብ ደገ ኣብ ካልእ ቦታ ይሓብኡ። እዚ ንማንቲለ ፋሲካ ዝምልከት ባህሊ እዩ። እዚኣ ዝተማህዘት ማንቲለ ኮይና ኣብ እዋን ጽድያ ንቆልዑት ዝኸውን እንቋቑሖታት እትሓብእ እያ። ኣብ ሓቀኛ ህይወት ግን ወለዲ እዮም ንቆልዑት ዝኸውን ናይ ደርሁት እንቋቑሖታትን ናይ ቸኮላታ እንቋቑሖታት ፋሲካን ዝሓብኡ። ብድሕሪኡ እቶም ቆልዑት ነዞም እንቋቑሖታት ክረኽብዎም ኣለዎም። ቆልዑት እውን ንበዓል ፋሲካ ዝኸውን እንቋቑሖታት ብዝተፈላለየ ሕብሪ ይቀብኡ። እዚ መብዛሕትኡ ግዜ ኣብ ቤት-ትምህርቲ እውን ይግበር እዩ።