ብሰንኪ ጎነጽ ዝመልኦ ሰልፍታት ብዙሕ ዘይምርግጋእ ኣብ ኔዘርላንድ

ኣብ ኔዘርላንድ ኩሉ ሰብ ሰልፊ ናይ ምክያድ መሰል ኣለዎ። እዚ ድማ ኣብ ቅዋም ሰፊሩ ይርከብ። እዚ ኣብ ትሕቲ ሓሳብካ ናይ ምግላጽ ናጽነት እዩ ዝምደብ። ኣብ ኔዘርላንድ ርእይቶኻ ክትገልጽ ምኽኣል ኣገዳሲ እዩ። ደሓር ከኣ ርእይቶኻ ምስ ናይ ኩሉ ሰብ ግድን ክሰማማዕ ዘለዎ ክኸውን ኣየድልየካን እዩ።

ሰልፊ ንምግባር፣ ካብቲ ሰልፊ ክትገብረሉ እትደልዮ ምምሕዳር ከተማ ፍቓድ ምርካብ ኣየድልየካን እዩ። ይኹን እምበር፣ ንምምሕዳር ከተማ (ንከንቲባ) ሰልፊ ክትገብር ከም ዝሓሰብካ ከተፍልጥ ኣለካ። ድሕሪኡ እቲ ከንቲባ እቲ ሰልፊ ብዘይ ስግኣት ከም ዝቕጽል ከረጋግጽ ይኽእል፣ ንኣብነት ጐደናታት ብምሕጻር። እዚ እቲ ከንቲባ ጎነጽ ክህሉው እዩ ኢሉ ትጽቢት ዝገብር እንተድኣ ኮይኑ እውን ይምልከት፣ ኣብ ከምዚ ኩነታት ድማ ፖሊስ ይዋፈሩ።

በይንኻ እንተድኣ ኮይንካ ሰልፊ ክትገብር ናብ ከንቲባ ምሕባር ኣየድልየካን እዩ።

እንተኾነ ግን ኣብ ሰልፊ ኩሉ ነገር ኣይፍቀድን እዩ። መሰል ሰልፊ ንሰላማዊ ተቓውሞ ጥራይ ዝምልከት እዩ። ዝኾነ ዓመጽ ወይ ጎነጽ ኣብ ጥቕሚ ክውዕል፣ ከምኡ እውን ኣድልዎ ወይ ጎነጽ ንምፍጻም ጻውዒት ምግባር ኣይፍቀድን እዩ። ኮይኑ ግን ሓደ ሓደ ግዜ ሰልፊ ብሰላም ይጅምር፣ ንእሽቶ ጉጅለ ድማ ዓመጽ ይጥቀም። ወይ ድማ ዓመጽ ዝጥቀሙ ሰባት ናብቲ ሰልፊ ይጽንበሩ። ሽዕኡ ነገራት ካብ ቚጽጽር ወጻኢ ይኾኑ፣ ፖሊስ ድማ ጣልቃ ይኣትዉ።

እዚ ሓደገኛ ክመስል ይኽእል እዩ፣ ከምኡ እውን ከፍርሓካ ይኽእል። ስለዚ ድማ እንታይ እንተገበርካ ዝበለጸ ምዃኑ ክትፈልጥ ትደሊ። እንታይ ክትገብር ከም እትኽእል ኣብዚ ዓንቀጽ ከተንብብ ትኽእል ኢኻ።