ኣብ ኔዘርላንድ ካብ 0 ክሳብ 4 ዓመት ንዝዕድሚኡ ውላድካ ክንክን ጥዕና ብኸምዚ ይሰርሕ

ኣብ ክሊኒክ ጥዕና ሕጻናት፣ ናይ ቆልዑት ነርሳትን ሓካይም ቆልዑትን ይሰርሑ። ውላድኩም ብግቡእ ይምዕብል ምህላዉን ዘይምህልዉን ድማ ይምርምሩ። ኣድላዪ እንተድኣ ኮይኑ፣ ንውላድኩም ናብ ሓፈሻዊ ሓኪም ወይ ክኢላ የመሓላልፍዎ። ናብ ክሊኒክ ጥዕና ሕጻናት ክትከዱ ወይ ምኽሮም ክትክተሉ ግዴታ የብልኩምን። ይኹን እምበር ኣብ ኔዘርላንድ መብዛሕትኦም ሰባት ነዞም ክሊኒካትን ምኽሮምን ኣብ ጥቕሚ የውዕልዎም እዮም።.

ውላድኩም ኣብ ክሊኒክ ጥዕና ሕጻናት ክታበት ክወስድ እውን ይኽእል እዩ። ኔዘርላንድ 'ሃገራዊ መድብ ክታበት' ዝበሃል ናይ መንግስቲ መደብ ክታበት ኣለዋ። ዕላማ ናይዚ መደብ ንውላድኩም ብመንገዲ ክታበት ካብ ተላባዒ ሕማማት ንምክልኻል እዩ። እዚ መደብ ንምኽታል ብመንግስቲ ምኽሪ ዝወሃብ እኳ እንተኾነ፣ ግዴታ ግን ኣይኮነን። ከም ወለዲ መጠን ውላድኩም ክታበት ዝወስድ ምዃኑን ዘይምዃኑን ክትመርጹ ትኽእሉ ኢኹም። ኣብ ኔዘርላንድ መብዛሕትኦም ወለዲ ደቆም የእኽትቡ እዮም።

ብዛዕባ ኣመጋግባ፣ ድቃስን ምዕባለ ውላድኩምን ሕቶታት ኣለኩም ድዩ? ብዛዕባ እዚኣቶም እውን ኣብ ክሊኒክ ጥዕና ሕጻናት ሕቶታት ከተቕርቡ ትኽእሉ ኢኹም። እቲ ክሊኒክ ጥዕና ሕጻናት፣ ንወለዲ ብዛዕባ ደቆም ንምምካር እውን ድሉው እዩ።

ድሕሪ ምውላድ ውላድኩም፣ ብኣውቶማቲክ ኣብ ክሊኒክ ጥዕና ሕጻናት ቆጸራ ንኽትሕዙ ዕድመ ክመጽኣኩም እዩ። ድሕሪ ሕርሲ ውላድኪ ኣብ ምምሕዳር ከተማ እንተድኣ ኣመዝጊብክዮ፣ ክሊኒክ ጥዕና ሕጻናት ብኣውቶማቲክ ክሕበር እዩ። ብድሕሪኡ ሓደ ናይቲ ክሊኒክ ሰራሕተኛ ምሳኺ ርክብ ክገብር እዩ፣ ከምኡ እውን ናይ መጀመርታ ቆጸራ ንኽትገብሪ ክዕድመኪ እዩ።

ውላድኩም ዕድሚኡ ኣስታት 4 ሳምንታት ምስ ኮነ ኣብቲ ናይ መጀመርታ ቆጸራኹም ክትሳተፉ ትኽእሉ ኢኹም። ምስቲ ናይ ዕድመ ደብዳቤ፣ ብዛዕባ ክታበት ኣብ ኔዘርላንድ ዝምልከት ሓበሬታ ዝሓዘ ደብዳቤ እውን ክመጽኣኩም እዩ። ደብዳቤ እንተድኣ ዘይመጺእኩም፣ ኣብ ምምሕዳር ከተማኹም ምስ ዝርከብ ክሊኒክ ጥዕና ሕጻናት ባዕልኹም ርክብ ክትገብሩ ትኽእሉ ኢኹም። ክሊኒክ ጥዕና ሕጻናት ክትረኽቡ እንተድኣ ዘይክኢልኩም፣ ኣብቲ ምምሕዳር ከተማ ንዝርከብ ኮንታክፐርሶንኩም ኣብ ምድላይ ንኽሕግዘኩም ሕተቱ።

ውላድኩም ገና ቋንቋ ኔዘርላንድ (ጽቡቕ) ኣይዛረብን ድዩ? ስለዚ ኣብ ክሊኒክ ጥዕና ሕጻናት ብዛዕባ ናይ ኣጋ ትምህርትን ቅድመ-ትምህርቲን (VVE) ምኽሪ ክትረኽቡ ትኽእሉ ኢኹም። ብመንገዲ VVE ውላድኩም ኣብ መጻወቲ ጉጅለ ወይ ኣብ መውዓሊ ሕጻናት ዝያዳ ብዙሕ ግዜ ክሳተፍ ይፍቀደሉ። ስለዚ ሽዕኡ እቲ ወጻኢታት መብዛሕትኡ ግዜ ዝበዝሕ ብምምሕዳር ከተማ ይከሓስ እዩ። ዕላማ VVE ናይ ቋንቋ ምዝሕታል ዘለዎም ሕጻናት ንመባእታዊ ቤት-ትምህርቲ ብዝበለጸ ንምድላው እዩ።