ዝተፈላለዩ ዓይነታት መድሕናት

ምስቲ ናይ መድሕን ትካል ውዕል መድሕን ንዝኣተኻሉ ዝምልከት ገለ ነገር እንተድኣ ኣጋጢሙ፣ እቲ ናይ መድሕን ትካል ገንዘብ ይህበካ። ንኣብነት ሓሚምካ ናብ ሆስፒታል ክትከይድ እንተድኣ ተገዲድካ ወይ ድማ ብድንገት ኣብ ገዛ ናይ ካልእ ሰብ ገለ ነገር እንተድኣ ሰቢርካ።

ነቲ ዝኣተኻዮ ውዕል መድሕን ዝኸውን ገንዘብ ትኸፍል። እዚ መብዛሕትኡ ግዜ ኣብ ነፍስወከፍ ወርሒ ክግበር ኣለዎ። እዚ "ክፍሊት ውዕል መድሕን" ይበሃል። ካብቲ ናይ መድሕን ትካል ድማ መድሕን ከም ዘለካ መርትዖ ክትረክብ ኢኻ። እዚ "መርትዖ ውዕል መድሕን" ይበሃል። ኣብኡ ድማ ኣየናይ መድሕን ከም ዘለካን ብልክዕ እንታይ መድሕን ከም እትረክብን ተጠቒሱ ይርከብ።

ውዕል ክትኣትወሎም እትኽእል ብዙሓት ዓይነታት መድሕናት ኣለዉ። ኣብ ኔዘርላንድ ገሊኦም መድሕናት ምግባር ግዴታ እዩ። ኣብ

ኣብዚ ታሕቲ ብዛዕባ ዝተፈላለዩ ዓይነታት መድሕናት ከተንብብ ትኽእል ኢኻ፡

እዚኦም መድሕናት ግዴታ እዮም፡

ኣብ ኔዘርላንድ ነፍስወከፍ ሰብ መድሕን ጥዕና ክህልዎ ኣለዎ። እዚ መድሕን እዚ ናብ ሓኪም ንምኻድ፣ ንመድሃኒታትን ናብ ሆስፒታል ንምእታውን ዝምልከቱ ወጻኢታት ዝኽሕስ እዩ።

እንተድኣ ትደልይ ኮይንካ፣ ኣብ ርእሲ እቲ ግዴታ ዝኾነ መሰረታዊ መድሕን፣ ተወሳኺ መድሕን ክትገብር እውን ትኽእል ኢኻ። ንኣብነት ንሕክምና-ስኒ ወይ ንፊዚዮተራፒ ዝኸውን።

መድሕን ተሓታትነት ብድንገት ገለ ነገር እንተድኣ ሰቢርካ ወይ ንሓደ ሰብ እንተጎዲእካ ዝከላኸለልካ ዓይነት መድሕን እዩ። ከም ኣብነት ንሓደ ሰብ ክትበጽሖ ከይድካ፣ ብድንገት ድማ ንሓደ ክቡር ሳርማ ጎኒጽካ ኣውዲቕካዮ ኢልና ንሕሰብ። ወይ ድማ ከልብኻ ኣብ መናፈሻ እናጎየየ እንከሎ ምስ ሓደ ሰብ ተናጒጹ ነቲ ሰብ ኣውዲቕዎ ንበል። ስለዚ እዚ መድሕን ምስ ዝህልወካ፣ ገለ ነገር ብድንገት ምስዘጋጥም ንኹሉ ወጻኢታት ባዕልኻ ክትከፍሎ ኣየድልየካን እዩ። እቲ መድሕን ነዚ የዋድደልካ እዩ።

መኪና፣ ሞተር ብሽክልታ፣ ቱግቱግ ወይ ላምብሬታ ኣለካ ድዩ? ስለዚ መድሕን ተሓታትነት ( መድሕን ሕጋዊ ተሓታትነት) ምግባር ግዴታ እዩ። ብሞተር ተሽከርካሪትካ ኣብ ልዕሊ ካልኦት ጉድኣት እንተድኣ ኣውሪድካ ወይ ንኣብነት ከቢድ ሓደጋ ምስ እትፈጥር ድማ ናይዚ መድሕን ትረክብ።

ኣብዚ ታሕቲ ብዛዕባ ግዴታ ዘይኮኑ፣ ግን ድማ ኣገደስቲ ዝኾኑ መድሕናት ከተንብብ ትኽእል ኢኻ፡

ናይ ትሕዝቶ ቤት መድሕን ምስ ዝህልወካ፣ ንኹሎም ኣብ ገዛኻ ዝርከቡ ከም በዓል ዓበይቲ ኣቚሑት ገዛ፣ መሳርሒታት፣ ክዳውንትን መጽሓፍትን ዝኣመሰሉ ነገራት ብዝምልከት መድሕን ትረክብ። ኣብ ገዛኻ ዝርከቡ ኣቚሑት ንኣብነት ብሰንኪ ባርዕ፣ ማይ፣ በርቂ ወይ ስርቂ እንተድኣ ጉድኣት በጺሕዎም ድማ እቲ ናይ መድሕን ትካል ገንዘብ ይኸፍል።

ኣየኖት ኣቑሑት መድሕን ከምዝረኽቡ ኣብ ነፍስወከፍ ናይ መድሕን ትካል ይፈላለይ እዩ። ገለ ነገር ምስ ዘጋጥም ካብ ናይ መድሕን ትካል እትረኽቦ ዝለዓለ መጠን ገንዘብ እውን ከምኡ ይፈላለይ እዩ።

መድሕን ቀብሪ ንገለ ክፋል ወጻኢታት ቀብሪኻ ወይ ምቕጻል ሬሳኻ ይሽፍን። ኣብ እትሞተሉ እዋን ስድራኻን መቕርብካን ልዑል ዝኽፈል ሕሳብ ከየጋጥሞም ምእንቲ፣ እዚ ኣገዳሲ እዩ። መድሕን ቀብሪ መብዛሕትኡ ግዜ ንሳንዱቕ ሬሳ ወይ ናይ ዝነደደ ሬሳ ሓምዂሽቲ ዝቕመጠሉ ቫዞ፣ ዕምባባታት፣ ናይ ሓዘን ካርድታት፣ መጓዓዝያን ናይ እንግዶት መግቢን ይሽፍን።

ነዚ መድሕን ዝኸውን ወርሓዊ

ናይ ገዛእ-ርእስኻ ናይ መድሕን ትካልን ዝደለኻዮ ዓይነት መድሕንን ክትመርጽ ትኽእል ኢኻ። እንታይ መድሕን ክትረክብ ከም እትደሊ ባዕልኻ ትውስን። እቲ ናይ መድሕን ትካል ነቲ ቀብሪ ከም ዘዋድዶ ክትገብር ትኽእል ኢኻ፣ ግን ድማ መቕርብካ ዝኾኑ ሰባት እውን በቲ ካብቲ ናይ መድሕን ትካል ዝረኽብዎ ገንዘብ ባዕላቶም ክገብርዎ ይኽእሉ እዮም።

ኣብ ኔዘርላንድ ብመሰረት እስላማዊ መምርሒ ስነ-ስርዓት ቀብሪ ንምውዳድ ይከኣል እዩ። ኣብ ኔዘርላንድ እስላማዊ ቀብሪ እንተድኣ ደሊኻ፣ ነዚ ብመንገዲ ምድሕንካ ባዕልኻ ከተዋድዶ ትኽእል ኢኻ። ኣብ መበቆል ሃገርካ ክትቅበር እንተድኣ ደሊኻ፣ ናይ "ምምላስ" መድሕን እውን ክትኣቱው ትኽእል ኢኻ። እዚ ማለት ምስ ሞትካ ናብ ዓድኻ ከም እትምለስ ይግበር ማለት እዩ። እዚ መድሕን እዚ መብዛሕትኡ ግዜ ክቡር እዩ።

ኣብ ኔዘርላንድ ዝተፈላለዩ ናይ እስላማዊ ቀብሪ መድሕናት ኣለዉ። ይኹን እምበር፣ እስላማዊ ናይ ቀብሪን ምምላስን መድሕን ዝህባ መድሕን ክትኣትወለን እትኽእል ዘይእስላማውያን ትካላት መድሕን እውን ኣለዋ። ንስኻ ብዝደለኻዮ ከተዋድዶ ድማ ትኽእል ኢኻ።

ገና ካልኦት ብዙሓት ክትኣትዎም እትኽእል መድሕናት እውን ኣለዉ፣ ከም በዓል መድሕን ጉዕዞ፣ መድሕን ህይወት፣ መድሕን ስንክልና-ዕዮን፣ መድሕን ሕጋዊ ወጻኢታትን ዝኣመሰሉ። መጀመርታ እቲ መድሕን ብሓቂ ዘድልየካ ምዃኑን ዘይምዃኑን መርምር። ነዞም ዝስዕቡ 2 ሕቶታት ድማ ንገዛእ-ርእስኻ ሕተት፡

1. እቲ ንውዕል መድሕን እትኸፍሎ ገንዘብ ምስቲ ገለ ነገር ምስ ዘጋጥም ዝኽፈልካ መጠን ገንዘብ ብምንጽጻር ኣዝዩ ልዑል ኣይኮነን ድዩ?

2. እቲ ንውዕል መድሕን እትኸፍሎ ገንዘብ ንዓኻ ኣዝዩ ክቡር ኣይኮነን ድዩ? እቲ መድሕን ብሓቂ ዘየድልየካ ምስ ዝኸውን ምናልባት እንተሰረዝካዮ ዝሓይሽ ክኸውን ይኽእል እዩ።

ኣብ VWN ዝርከብ ኣማኻሪኻ ወይ ናይ ካልእ ውድብ ማሕበራዊ ኣማኻሪ፣ መድሕናት ኣብ ምምራጽ ክሕግዘካ ይኽእል እዩ።