ብኸመይ ናይ መውዓዪ ቤት ወጻኢታትካ ትሑት ትገብሮ?
ኣብ ማሕበራዊ ሚድያ ኣካፍል፡
ሓጋይ ማለት ናይ ቁሪ ወቕቲ ጀሚሩ ኣሎ፣ ኣብ ግዳም ድማ ቁሪ እዩ ዘሎ። ገዛኻ ውዑይ ክኸውን ትደልይ ኢኻ፣ ኮይኑ ግን ምውዓይ ገዛ ክቡር እዩ። ኣብዚ ዓንቀጽ፣ ናይ ምውዓይ (ጸዓት) ወጻኢታትካ ትሑት ንኽኸውን ዝሕግዙ ቀለልቲ ምኽርታት ከተንብብ ኢኻ። ብኸምዚ ገንዘብ ትቚጥብ፣ ገዛኻ ድማ ደስ ዝብል ሙቐት ይህልዎ።
ናይ ምውዓይ ወጻኢታትካ ትሑት ከምዝኸውን ዝገብሩ ምኽርታት
ነቲ መውዓዪ ኣብ ስማርትን፣ ኣዝዩ ልዑል ዘይኮነን ገይርካ ኣዋድዶ
ንመውዓዪኻ ኣዝዩ ልዑል ኣይትግበሮ። ንኣብነት ኣብ ገዛኻ ኣብ ዘለኻሉ እዋን ዝለዓለ ሙቐት 19 °C ንምቹእነት እኹል እዩ። ኣብ እትድቕሰሉ ወይ ኣብ እትወጽኣሉ እዋን (ንኣብነት ከባቢ 15 °C) ነቲ መውዓዪ ቀንሶ ወይ ኣጥፍኣዮ። ነፍስወከፍ ዲግሪ ብዝቐነስካ መጠን ኣብ ናይ ምውዓይካ ወጻኢታትካ ብዙሕ ክቑጥበልካ ይኽእል እዩ። ከምኡ እውን ነቲ መውዓዪ ኣብ እትቕንሰሉ እዋን፣ ሙቐት ዝህብ ጎልፎ ወይ ሸበጥ ተኸደን።
ኣብ ዘለኻዮም ክፍልታት ጥራይ መውዓዪ ተጠቐም
ንነፍስወከፍ ክፍሊ መውዓዪ ምጥቃም ኣየድልየካን እዩ። ነተን ከም ሳሎንን መደቀሲ ክፍልን ዝኣመሰላ ዘለኻለን ክፍልታት ጥራይ ኣውዕይ። ናይተን ዘይትህልወልን ክፍልታት ማዕጾታት ድማ ዕጸዎ።
ንገዛኻ መዕገቲ ግዳማዊ-ዛሕሊ ብምግባር ቁሪ ከምዝቕንስ ግበር
ኣብ ውሽጢ ገዛ ሙቐት ንምዕቓብ፣ መዕገቲ ግዳማዊ-ዛሕሊ ምግባር ጽቡቕ ኣገባብ እዩ። ብፍላይ ኣብ ሓጋይ ማለት ናይ ቁሪ ወቕቲ፣ እዚ ናይ ጸዓት ክሳራ ይቕንስ እዩ። ካብ ውሽጢ ገዛ ሙቐት ንደገ እንተድኣ ዘይኣምሊጡ፣ ብዙሕ መውዓዪ ምጥቃም ኣየድየካን እዩ። ዝሑል ኣየር ንውሽጢ ንኸይኣቱ፣ ኣብ ዙርያ መስኮትካን ማዕጾኻን ዛሕሊ ዝዓግት ተሰኳዒ ግጠመሎም። ብድሕሪ ራድየተረታትካ ድማ ናይ ራድየተር ቀጸላ ምስ ዝህልዎ፣ እቲ ሙቐት ናብቲ ክፍሊ ንኽምለስ ይሕግዝ። ኣብ እዋን ምሸት መጋረጃታት ምዕጻው እውን፣ እቲ ሙቐት ኣብ ውሽጢ ንኽጸንሕ ይሕግዝ እዩ።
ስማርት ናይ ምውዓይ ሜላታት ተጠቐም
ስማርት መቖጻጸሪ ሙቐት፡ ስማርት መቖጻጸሪ ሙቐት፣ መዓስ ኣብ ገዛኻ ከም እትህልው ይመሃር፣ ከምኡ እውን ነቲ መውዓዪ ባዕሉ ብኣውቶማቲክ የስተኻኽሎ። እዚ ድማ ጸዓት ይቚጥብ።
ንመውዓዪኻ ኣዋድዶ፡ ካብ ድቃስካ ምስ ተበራበርካ ወይ ኣብ ገዛ ምስ በጻሕካ ጥራይ ከም ዝውላዕ ገይርካ ከተዋድዶ ትኽእል ኢኻ። እቲ መውዓዪ ዝውላዓሉ ወይ ዝጠፍኣሉ ግዜ እውን ባዕልኻ ከተዋድዶ ትኽእል ኢኻ።
ናይ ራድያተር መርውሓ ጸዓት ይቑጥብ
ናይ ራድያተር መርውሓ ማለት ቬንቲሌተር ኣብ ትሕቲ ራድያተርካ እተግጥሞ ቀሊል መሳርሒ እዩ። ስለዚ እቲ ራድያተር ምስ ዝውዕይ፣ እቲ መርውሓ ክዘውር ይጅምር። እዚ ድማ እቲ ራድያተር ናብቲ ክፍሊ ዝለቖ ሙቐት ከም ዝውስኽ ይገብር።
ንኣሽቱ ልምድታት እውን ይሕግዙ እዮም
ዓበይቲ ኣቚሑት ገዛ ኣብ ቅድሚ ራድያተራት ኣይተጸግዕ፣ እዚ ድማ እቲ ሙቐት ኣብቲ ክፍሊ ዝያዳ ብዝሓሸ ንኽዘውር የኽእሎ። ነቲ መውዓዪ ድሕሪ ምጥፋእካ፣ ነቲ ክፍሊ ንሓጺር ግዜን ብጽቡቕን ንጹህ ኣየር ከም ዝኣትዎ ግበር፣ ምኽንያቱ ንጹህ ኣየር ካብ ጥሉል ኣየር ንላዕሊ ቀልጢፉ ስለ ዝውዕይ። ሙቕት ጸሓይ ንኽኣቱው ድማ ኣብ እዋን ቀትሪ መጋረጃታትካ ክፈቶም፣ ኣብ እዋን ምሸት ድማ እንደገና ትዓጽዎም።
ብዛዕባ ኣማራጺታትን ተወሳኺ ምንጪ ሙቐትን ሕሰብ
ተወሳኺ ጋዝ ከይተጠቐምካ ቀልጢፉ ከም ዝውዕይ ክትገብር እንተድኣ ደሊኻ፣ ከምዚ ክትገብር ትኽእል ኢኻ፡
መሞቒ መተርኣስ ወይ ኤሌክትሪካዊ ኮቦርታ፡ ብፍላይ ኣብ መንበር ኮፍ ኣብ እትብለሉ፣ ወይ ኣብ ዓራት ኣብ እትድቕሰሉ እዋን፣ ሙቐት ዝህብ ኮቦርታ ወይ መተርኣስ፣ ሙቐት ንኽትረክብ ይሕግዘካ።
መሞቒ፡ እዚ ኣብቲ ዘለኻዮ ክፍሊ ጥራይ ኣቐምጦ፣ ስለዚ ምሉእ ገዛ ውዑይ ክኸውን ኣየድዮን እዩ።
ዓበይቲ ስጉምትታት (ከተዋድዶም ዓቕሚ ምስ ዝህልወካ)፡ ኣብ መንደቕ፣ ናሕሲ ወይ ባይታ ዝያዳ መዕገቲ ግዳማዊ-ዛሕሊ ምግባር፣ ኣብ ዝተናዋሐ ግዜ ብዙሕ ጸዓት ይቑጥብ እዩ። ሙቐት ኣበይ ከም ዝጠፍእ ንምርኣይ፣ ናይ ገዛኻ ናይ ጸዓት ስካን ንምጥቃም ኣብ ግምት ኣእቱው።
ብኸምዚ ወጻኢታት መውዓዪ ቤት ክትቚጥብ ትኽእል
ብብልሓት መውዓዪ ብምጥቃም ብዙሕ ገንዘብ ክትቚጥብ ትኽእል ኢኻ። ነቲ መውዓዪ ኣዝዩ ልዑል ገይርካ ኣይተዋድዶ፣ ከምኡ እውን ነተን ዘለኻየን ክፍልታት ጥራይ ኣውዕየን። ማዕጾታት ዕጸዎም፣ ከምኡ እውን ንኣብነት መዕገቲ ዝሑል ኣየር ተሰኳዒን መጋረጃታትን ብምጥቃም ዝሑል ኣየር ንውሽጢ ከም ዘይኣቱው ግበር። ሙቐት ዝህብ ክዳውንቲ ምኽዳንን፣ ነቲ መውዓዪ ቅድሚ ምውላዕካ ነቲ ክፍሊ ንሓጺር እዋን ንጹህ ኣየር ከም ዝኣትዎ ምግባርን ዝኣመሰሉ ንኣሽቱ ልምድታት እውን ይሕግዙ እዮም። ብኸምዚ ኣገባብ ድማ ልዑል ናይ ጸዓት ወጻኢታት ብዘይብሉ፣ ገዛኻ ውዑይን ምቹእን ይኸውን።