ኣብ ኣዳራሽ ምምሕዳር ከተማ ኣብ ዝግበር ወግዓዊ ኣኼባ ኔዘርላንዳዊ ትኸውን
IND ኣወንታዊ ውሳኔ እንተድኣ ሂቡ፣ ኔዘርላንዳዊ ንምዃን ኣብ ወግዓዊ ኣኼባ ንኽትሳተፍ ካብ ምምሕርዳር ከተማ ዕድመ ክትቕበል ኢኻ። ኣብ እዋን እዚ ኣኼባ ‘መግለጺ ተወፋይነት’ ክትገብር ኢኻ። እዚ ድማ ኔዘርላንዳዊ ንምዃን ዘድልይ ናይ መወዳእታ ስጉምቲ እዩ።
ከንቲባ ብደብዳቤ ናብ ኣኼባ ንኽትመጽእ ይዕድመካ
ናይቲ እትነብረሉ ምምሕዳር ከተማ ከንቲባ፣ ናብ ወግዓዊ ኣኼባ ንኽትመጽእ ክዕድመካ እዩ፣ ኣብኡ ድማ ኔዘርላንዳዊ ክትከውን ኢኻ። እዚ ኣኼባ እዚ ‘ወግዒ ዜግነት’ ተባሂሉ ይጽዋዕ። እዚ ኣኼባ መብዛሕትኡ ግዜ ኣብ ኣዳራሽ ምምሕዳር ከተማ እዩ ዝካየድ። ጽንብላዊ ኣኼባ እዩ። ኣብኡ ድማ ልክዕ ከማኻ ኔዘርላንዳውያን ዝኾኑ ብዙሓት ሰባት ክህልዉ ይኽእሉ እዮም።
ኣብቲ ወግዒ ዜግነት ንኽትሳተፍ ግዴታ ኣለካ
ኣብቲ ‘ወግዒ ዜግነት’ ምስ እትሳተፍ ጥራይ ኢኻ ኔዘርላንዳዊ ትኸውን። ስለዚ ምምሕዳር ከተማ እንተድኣ ዓዲሙካ፣ ኩሉ ግዜ ኣብቲ ናይ ዜግነት ወግዒ ክትሳተፍ ኣለካ። ምምሕዳራት ከተማታት እየን ነዞም ወግዓዊ ጽንብላዊ ኣኼባታት ዝውድባ። ምምሕዳር ከተማ ድማ ኔዘርላንዳዊ ትኸውን ምህላውካ ምሳኻ ብሓባር የብዕል።
እቲ ናይ ዜግነት ሕቶ ኣብ ዝቐረበሉ እዋን ውላድካ ዕድሚኡ 16 ዓመት ወይ ልዕሊኡ ድዩ ነይሩ? ስለዚ ውላድካ እውን ኣብዚ ኣኼባ ንኽሳተፍ ግዴታ ኣለዎ። ውላድካ ሽዕኡ ትሕቲ 16 ዓመት ድዩ? ስለዚ ውላድካ ኣብቲ ወግዒ ክሳተፍ ኣየድልዮን እዩ፣ እንተኾነ ግን ክመጽእ ይኽእል እዩ።
ሕጂ ብወግዒ ኔዘርላንዳዊ ኮይንካ ኣለኻ፣ ፓስፖርት ክትሓትት ድማ ትኽእል ኢኻ
እቲ ኣብቲ ጽንብላዊ ኣኼባ ዝተቐበልካዮ ናይ ዜግነት መረጋገጺ ወረቐት፣ ኔዘርላንዳዊ ምዃንካ ወግዓዊ መርትዖ እዩ። ነዚ ተጠቒምካ ድማ ናይ ኔዘርላንድ ፓስፖርት ወይ መንነት ወረቐት ንምርካብ ናብ ምምሕዳር ከተማ ከተመልክት ትኽእል ኢኻ።